Umuyobozi Mukuru ushinzwe ubufatanye bw’ingabo n’abaturage (J9) mu Ingabo z’u Rwanda, Col Désiré Migambi Mungamba, yashishikarije abanyeshuri bo mu Ishuri Rikuru ry’Imyuga n’Ubumenyingiro rya Tumba, gukoresha ubumenyi bafite mu ikoranabuhanga mu guteza imbere igihugu.
Yabitangaje mu kiganiro yatanze muri iri shuri, mu rwego rw’ibikorwa byo kwizihiza Umunsi w’Intwari z’Igihugu wizihijwe ku ya 1 Gashyantare 2026.
Insanganyamatsiko y’uyu mwaka yagiraga iti: “Ubutwari n’Ubumwe bw’Abanyarwanda: Inkingi z’Iterambere.”
Ni insanganyamatsiko igamije kwimakaza indangagaciro z’ubutwari zirimo gukunda igihugu, ubumwe n’inshingano, by’umwihariko mu rubyiruko.
Col Migambi yibanze ku ruhare rw’urubyiruko rufite ubumenyi mu by’ikoranabuhanga, arusaba kurushaho kurubyaza umusaruro mu guhanga ibisubizo bishya byihutisha iterambere.
Yasobanuye ko indangagaciro Nyarwanda zirimo ubumwe, amahoro, ubusugire bw’igihugu n’iterambere ari zo musingi watumye u Rwanda rubasha kwiyubaka no gukomera mu bihe bitandukanye by’amateka yarwo.
Agaruka ku rugero rw’ubutwari bwaranze ingabo za RPA mu rugamba rwo kubohora igihugu, yasabye abanyeshuri kubwigiraho, bakarangwa n’umuhate, kwitanga no gukorera igihugu batizigamye.
Col Migambi yanibukije abanyeshuri kwirinda icyahungabanya umutekano w’igihugu, abasaba gukomeza kurangwa n’ubudahemuka, inshingano no kurinda isura nziza y’u Rwanda aho bari hose.
Eng. Rita Clemence Mutabazi, Umuyobozi w’Ishuri Rikuru ry’Imyuga n’Ubumenyingiro rya Tumba, yashimangiye ko ubutwari ari umusingi w’umuco Nyarwanda.
Yasabye abanyeshuri guhora bakura isomo ku ntwari z’u Rwanda, bakazifata nk’icyitegererezo mu mibereho yabo ya buri munsi no mu mwuga wabo w’ahazaza.
