Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi (NAEB), cyatangaje ko kuva tariki 8 kugeza kuri 12 Kamena 2026, ibikomoka ku buhinzi n’ubworozi byoherejwe mu mahanga byinjirije u Rwanda asaga miliyari 15 Frw.
Ibi byatangajwe muri raporo y’icyumweru ya NAEB igaragaza uko ibikomoka ku buhinzi n’ubworozi byoherejwe hanze n’amafaranga byinjije.
NAEB yatangaje ko umusaruro wajyanywe ku isoko mpuzamahanga muri iyi minsi itanu upima na toni 9.946.
Ikawa yoherejwe ku isoko mpuzamahanga yari toni 383, zinjije miliyari 3,4 Frw, icyayi kiba toni 825 zinjije miliyari 3,3 Frw naho imboga zari toni 312 zinjije miliyoni 522 Frw.
NAEB kandi yagaragaje ko mu bindi byacurujwe harimo imbuto zipima toni 323 zinjije miliyoni 326 Frw, indabo zari toni 14, zinjiza miliyoni 114 Frw, mu gihe ibihingwa bitandukanye birimo ibinyabijumba, ibinyamisogwe,ibinyampeke byari toni 7.846 byinjiza miliyari 7,6 Frw.
Amatungo n’ibiyakomokaho byari toni 243 zinjirije u Rwanda miliyoni 399 Frw.
Ibihugu byoherejwemo umusaruro uvuye mu Rwanda harimo u Bushinwa, u Bwongereza, u Bufaransa, Leta Zunze Ubumwe z’Abarabu, Bangladesh, Oman, u Buholandi n’ibihugu byo ku Mugabane wa Afurika.
