Ikigo cy’Igihugu gishinzwe Guteza Imbere Iyoherezwa mu Mahanga ry’Ibikomoka ku Buhinzi n’Ubworozi (NAEB) cyatangaje ko ibicuruzwa byoherejwe ku masoko mpuzamahanga hagati ya tariki ya 29 Kamena n’iya 1 Nyakanga 2026 byinjirije u Rwanda amafaranga arenga miliyari 9,18 Frw.
Muri iyo minsi, u Rwanda rwohereje hanze toni 9.454 z’ibicuruzwa bitandukanye. Ikawa yoherejwe yari toni 455, zinjiza miliyari 2,1 Frw, mu gihe icyayi cyageze kuri toni 648, kikaba cyarinjirije igihugu miliyari 1,8 Frw.
Imboga zoherejwe ku masoko yo hanze zinganaga na toni 462, zinjije miliyoni zirenga 479 Frw, naho imbuto zari toni 243 zinjiriza igihugu miliyoni 168 Frw. Indabo zoherejwe zinganaga na toni 10, zitanga amafaranga arenga miliyoni 57 Frw.
NAEB kandi yagaragaje ko ibindi bihingwa birimo ibinyabijumba, ibinyamisogwe, ibinyampeke n’ibindi byoherejwe mu mahanga bipimaga toni 7.218, bikinjiriza u Rwanda arenga miliyari 3,8 Frw.
Ku ruhande rw’ibikomoka ku matungo, toni 427 zoherejwe ku masoko mpuzamahanga zinjije miliyoni 679 Frw.
Ibi bicuruzwa byagejejwe mu bihugu bitandukanye birimo u Bwongereza, u Buholandi, u Bufaransa, u Buhinde, Leta Zunze z’Abarabu, ndetse no mu bihugu bitandukanye byo ku Mugabane wa Afurika.
