Ikigo cy’Igihugu cy’Ibarurishamibare mu Rwanda, NISR cyatangaje ko mu gihembwe cy’Ihinga cya 2026 A umusaruro w’ibihingwa by’ingenzi birimo ibitoki, ibirayi n’ibijumba wiyongeye ugereranyije n’uko wari uhagaze mu gihembwe cya mbere cya 2025.
Muri raporo NISR yasohoye kuri uyu 15 Mata 2026, yatangaje ko mu bushakashatsi bwakozwe kuva tariki 1 bwagaragaje ko umusaruro w’ibitoki wiyongereyeho 4,1%, aho warenze toni miliyoni 1,3, ibirayi byiyongereyeho 3,3% bigera kuri toni 491.564, mu gihe ibijumba byiyongeraho 3% bigera kuri 675.768.
Iyi raporo igaragaza ko ubuso burenga hegitari miliyoni imwe bwahinzweho ibihingwa byerera igihembwe, na ho hegitari ibihumbi 501 zahinzweho ibihingwa bitinda mu murima (nk’ikawa, icyayi n’ibitoki), mu gihe hegitari 84.000 zakoreshejwe nk’inzuri zihoraho.
Umusaruro w’ibishyimbo wageze kuri toni 229.396 bingana n’izamuka rya 0,5% mu gihe umusaruro w’umuceri wageze kuri toni 71.080, bivuze inyongera ya 2%.
Ibigori byahinzwe kuri hegitari 245.405, ibishyimbo bihingwa kuri hegitari 327.907, mu gihe ibirayi byahinzwe ku buso bungana na hegitari 55.310.
Muri iki gihembwe ibijumba byahinzwe kuri hegitari 96.217, imyumbati ihingwa ku buso bungana na hegitari 236.357 na ho hegitari 267.676 zari zihinzeho urutoki.
Iyi raporo igaragaza ko Imbuto z’indobanure zakoreshwejwe na 37% by’abahinzi bose. Abahinzi bato bazikoreshe bangana na 35,2% mu gihe abahinzi banini bazikoresheje bangana na 82,6%.
Ifumbire y’imborera yakoreshejwe na 90,2% by’abahinzi bose aho 90,4% by’abahinzi bato bayikoreshe naho 83,6% by’abahinzi banini ni bo bayikoresheje.
Ifumbire mvaruganda yakoreshejwe na 67,2% by’abahinzi bose aho 66,3% by’abahinzi bato aribo bayikoresheje mu gihe 89,6% by’abahinzi banini ari bayikoresheje.
46,9% by’abahinzi bakoresheje imiti irwanya indwara z’ibihingwa aho yakoreshejwe na 45,2% by’abahinzi bato na 91,4% by’abahinzi banini.
Muri iki gihembwe cya 2026 A, 14,4% by’abahinzi bakoresheje uburyo bwo kuhira, naho 92,4% batangaje ko bafite nibura uburyo bumwe bwo kurwanya isuri mu mirima yabo.
Iyi raporo yerekana ko abangana na 53,4% by’abahinzi bavanze ibiti n’ibihingwa mu gihe 1,7% gusa ari bo bakoresheje imashini mu bikorwa byabo by’ubuhinzi.
NISR iherutse gutangaza izamuka ry’ibiciro ku masoko byiyongereyeho 9,2% muri Werurwe 2026 ugereranyije n’uko byari bihagaze muri Werurwe ya 2025.
Ubu bushakashatsi bukorwa mu rwego rwo gukurikirana uko ubuhinzi buhagaze, no gufasha mu ifatwa ry’ibyemezo bishingiye ku mibare, hagamijwe guteza imbere urwego rw’ubuhinzi mu Rwanda.
