sangiza abandi

Icyuho mu bucuruzi bw’u Rwanda n’amahanga cyageze kuri miliyoni 336.3$ muri Nzeri

sangiza abandi

Icyuho hagati y’agaciro k’ibicuruzwa u Rwanda rwohereza mu mahanga n’ibyo rutumiza hanze cyageze kuri miliyoni 336.3$ muri Nzeri 2026, cyiyongeraho 61.01% ugereranyije na Kanama 2026, bitewe ahanini no kugabanuka kw’ibyoherezwa mu mahanga no kwiyongera kw’ibitumizwa mu gihugu.

Imibare y’Ikigo cy’Igihugu cy’Ibarurishamibare (NISR), yashyizwe hanze ku wa 16 Ugushyingo 2026, igaragaza ko muri Nzeri u Rwanda rwohereje mu mahanga ibicuruzwa bifite agaciro ka miliyoni 320.29$, mu gihe ibitumizwa mu mahanga byari bifite agaciro ka miliyoni 656.59$.

Iyi mibare igaragaza ko icyuho cy’ubucuruzi cyiyongereyeho 7.8% ugereranyije na Nzeri 2025, bikaba byerekana ko agaciro k’ibicuruzwa igihugu gitumiza mu mahanga gakomeje kuruta kure ak’ibyo cyoherereza andi masoko.

Iri zamuka ryabaye mu gihe agaciro k’ibicuruzwa u Rwanda rwohereje mu mahanga kagabanutseho 11.58% ugereranyije na Kanama 2026, nubwo kari kiyongereyeho 136.17% ugereranyije na Nzeri 2025.

Mu bicuruzwa byoherejwe mu mahanga bikomoka mu Rwanda, ibyari bifite agaciro kanini ni ibyoherejwe muri Nzeri bifite agaciro ka miliyoni 245.91$, bivuye kuri miliyoni 278.13$ byari ho muri Kanama 2026. Ibindi bicuruzwa byinjiye mu Rwanda bivuye mu mahanga, bikongera koherezwa mu bindi bihugu (re-exports), byari bifite agaciro ka miliyoni 74.38$.

Mu byiciro by’ibicuruzwa byoherejwe mu mahanga, ibikoresho by’ibanze bikoreshwa mu nganda bitari ibikomoka kuri peteroli byari bifite agaciro ka miliyoni 87.32$.

Hakurikiyeho ibindi bicuruzwa n’ibikorwa bitashyizwe mu byiciro byihariye, bifite agaciro ka miliyoni 62.33$, n’ibikomoka ku biribwa n’amatungo byinjije miliyoni 50.72$.

Ku rundi ruhande, agaciro k’ibicuruzwa u Rwanda rutumiza mu mahanga kiyongereyeho 16.67% ugereranyije na Kanama 2026, na 36.79% ugereranyije na Nzeri 2025.

Naho agaciro k’ibicuruzwa byinjira mu Rwanda bikongera koherezwa mu bindi bihugu (re-exports) kagabanutseho 1.85% ugereranyije na Kanama 2026, ariko kiyongeraho 16.40% ugereranyije na Nzeri 2025.

Ibihugu u Rwanda rwoherezamo ibicuruzwa byinshi

Mu bihugu u Rwanda rwoherejemo ibicuruzwa byinshi muri Nzeri 2026, Leta Zunze Ubumwe z’Abarabu (UAE) zaje ku mwanya wa mbere, aho rwoherejeyo ibicuruzwa bifite agaciro ka miliyoni 64.05$.

Ubushinwa bwaje ku mwanya wa kabiri n’ibicuruzwa bifite agaciro ka miliyoni 51.37$, bukurikirwa na Repubulika Iharanira Demokarasi ya Congo (RDC) rwoherejeyo ibifite agaciro ka miliyoni 32.69$.

Leta Zunze Ubumwe za Amerika zaje ku mwanya wa kane n’ibicuruzwa bifite agaciro ka miliyoni 18.39$, mu gihe u Buhinde bwaje ku mwanya wa gatanu n’ibifite agaciro ka miliyoni 6.68$.

Muri rusange, ubucuruzi bw’u Rwanda n’amahanga muri Nzeri 2026, buhujwe n’agaciro k’ibicuruzwa byoherejwe mu mahanga n’ibyatumijwe mu gihugu, bwari bufite agaciro ka miliyoni 976.88$.

Iyi mibare igaragaza ko nubwo ibyoherezwa mu mahanga byiyongereye cyane ugereranyije n’umwaka ushize, kugabanuka kwabyo mu kwezi kwa Nzeri no kwiyongera kw’ibitumizwa mu mahanga byatumye icyuho cy’ubucuruzi kirushaho kuzamuka.

Icyuho mu bucuruzi bw’u Rwanda n’amahanga cyiyongereyeho 61% mu kwezi kumwe

Photos:

[fluentform id="3"]