Guverineri w’Intara y’Amajyaruguru, Mugabowagahunde Maurice yatangaje ko imibare y’ibanze imaze gukorwa igaragaza ko inkongi y’umuriro yibasiye inyubako y’ubucuruzi ya GOICO Plaza iherereye mu Karere ka Musanze yangije ibicuruzwa bifite agaciro k’asaga miliyari 30 Frw mu gihe ubugenzuzi bugikomeje.
Guverineri Mugabowagahunde yabwiye RBA ko iyi nyubako yari ihagaze agaciro ka miliyari 17 Frw.
Yagize ati “ Muri rusange inyubako ubwayo ibarirwa agaciro kabarirwa kuri miliyari 17 Frw, ndetse imibare y’ibanze dufite igaragaza ko iyi nyubako yari irimo ibicuruzwa bifite agaciro k’asaga miliyari 30 Frw.”
Guverineri Mugabowagahunde yavuze ko iperereza rigikomeje kuko inzego zitandukanye zibishinzwe zikomeje kugenzura agaciro k’ibyangijwe nyirizina no kureba icyateye iyi nkongi muri rusange.
Isoko rya GOICO ryafashwe n’inkongi ku wa Gatandatu, tariki ya 10 Ukwakira 2026, ahagana Saa Kumi z’amanywa, itangirira mu gice cyo hejuru cy’inyubako mbere yo gukwirakwira mu yandi magorofa.
Kugeza mu gitondo cyo kuri iki cyumweru Ishami rya Polisi y’u Rwanda rishinzwe Kuzimya Inkongi n’Ubutabazi, ryari rigikomeje ibikorwa byo kuzimya kuko hari ibice byari.
Minisiteri y’Ubutegetsi bw’igihugu yatangaje ko Guverinoma y’u Rwanda yihanganishije abacuruzi, abikorera n’abandi bose bagizweho ingaruka n’inkongi y’umuriro yibasiye Isoko rya GOICO mu Mujyi wa Musanze, inizeza ubufatanye mu gusana iyi nyubako kugira ngo ibikorwa by’ubucuruzi bisubukurwe.
Mu itangazo MINALOC yashyize hanze yavuze ko inzego zibifitiye ububasha zatangiye iperereza rigamije kumenya icyateye iyi nkongi, mu gihe hakomeje ibikorwa byo kugenzura ibyangiritse.
Guverinoma y’u Rwanda kandi yagaragaje ko izafatanya n’inzego zibishinzwe mu bikorwa byo gusana iri soko kugira ngo ibikorwa by’ubucuruzi byongere bisubukurwe.
Ubuyobozi bw’akarere ka Musanze kandi bwatangaje ko nta muntu iyi nkongi yahitanye, ariko ko hari abakomeretse n’abagize ibibazo by’ubuzima byatumye bajyanwa kwa muganga.
Bwagaragaje ko abantu babiri bakomeretse byoroheje, mu gihe abandi 15 bahungabanye kubera ibyabaye, bose bakaba barajyanywe mu bitaro kugira ngo bitabweho n’abaganga.
Isoko rya GOICO rifite amagorofa atanu rikaba ryurubatswe mu 2017 na sosiyete ya Gorilla Investment Company, ihuriyemo abikorera 89 bo mu Karere ka Musanze, ritwaye agera kuri miliyari 7,5 Frw.
Imibare igaragaza ko iri soko ricururizwamo n’abantu basaga 1550, mu gihe abarigana ku munsi bagera ku bihumbi 25.
Kugeza ubu ntiharatangazwa impamvu nyayo y’icyateye umuriro gusa mu gihe iperereza rigikorwaho hari amakuru avuga ko ishobora kuba yaratewe n’ibikorwa byo gusudira ibyuma byakorerwaga muri iyo nyubako.
