Intumwa ziturutse muri Minisiteri y’Ingabo za Mozambique, ziyobowe na Maj Gen Samuel Luluva, umuyobozi mukuru ushinzwe Serivisi z’imibereho myiza, zatangiye uruzinduko rw’akazi rugamije gushimangira umubano usanzwe mu bya gisirikare hagati y’u Rwanda na Mozambique.
Iri tsinda ryasuye Urwibutso rwa Jenoside rwa Kigali, aho ryunamiye inzirakarengane zazize Jenoside yakorewe Abatutsi mu 1994, rinasura Inzu Ndangamurage y’Urugamba rwo guhagarika Jenoside.
Muri uru ruzinduko, Maj Gen Samuel Luluva n’itsinda ayoboye biteganyijwe ko bazasura Minisiteri y’Ingabo, ibigo biyishamikiyeho byita ku mibereho myiza y’abakozi bayo.
U Rwanda na Mozambique bisanzwe bifitanye umubano ukomeye mu bya Gisirikare, aho ingabo z’u Rwanda na Polisi zifasha iki gihugu kugarura amahoro n’umutekano.
