Kuva ku Cyumweru tariki 20 Nzeri 2026, i Montréal muri Canada hari kubera Shampiyona y’Isi y’Amagare yo gusiganwa mu muhanda ya 2026, UCI Road World Championships, yaherukaga kubera mu Rwanda umwaka ushize byarugize Igihugu cya mbere cyo muri Afurika cyari cyakiriye iri rushanwa.
Abakinnyi 15 bakina mu byiciro bitandukanye nibo bahagurutse mu Rwanda berekeza muri Canada guhagararira Igihugu muri iyi Shampiyona y’Isi y’Amagare ndetse ni ubwa mbere u Rwanda rwahagarariwe n’abakinnyi benshi iri rushanwa ryabereye hanze y’u Rwanda.
Kuri uyu wa Kabiri tariki 22 Nzeri 2026, harakinwa umunsi wa gatatu w’iyi Shampiyona.
Harakinwa ibyiciro bitatu birimo gusiganwa n’ibihe nk’ikipe (Team Time Trial Mixed Relay) ariko u Rwanda ntiruhagararirwa muri iki cyiciro, no gusiganwa n’ibihe buri mukinnyi ku giti cye (Individual Time Trial) mu ngimbi n’abangavu batarengeje imyaka 18.
Ishimwe Brian na Byusa Pacifique barahagararira u Rwanda mu ngimbi, aho abakinnyi batangira isiganwa muri rusange ari 69, uwa mbere ahaguruke 18h18 ku isaha y’i Kigali, basiganwe ku ntera y’ibilometero 20.3.
Ishimwe Brian aratsimbura saa 18:21 naho Byusa Pacifique ahaguruke saa 18:34.
Mu bangavu, u Rwanda ruragararirwa na Akimana Donatha na Masengesho Yvonne , aho abakinnyi batangira isiganwa muri rusange ari 58, basiganwe ku ntera ya kilometero 10.7.
Akimana Donatha arahaguruka mbere y’abandi bose saa 21h15 ku isaha y’i Kigali naho Masengesho Yvonne aratsimbura saa 21:25.
Ese abanyarwanda bitwaye gute mu minsi ibiri ya mbere
Ku Cyumweru tariki 20 Nzeri 2026, hakinwe icyiciro cyo gusiganwa n’ibihe mu bagore n’abagabo babigize umwuga ku ntera ya kilometero 39.2.
My bagore, abanyarwandakazi bahatanye muri iki cyiciro bombi basoje bakurikirana; Nirere Xaveline yarangirije ku mwanya wa 37 arushwa iminota 9 n’amasegonda 17 n’uwabaye uwa mbere, naho Ingabire Diane asoreza ku mwanya wa 38 arushwa iminota 9 n’amasegonda 45.
Umusuwisi Reusser Marlen niwe wabaye uwa mbere akoresheje iminota 50 n’amasegonda 24, akurikirwa n’umwongereza Backstedt Zoe n’umudage Koch Franziska wabaye uwa 3 mu bakinnyi 47 barangije isiganwa, mu gihe umwe ariwe utararirangije.
Mu cyiciro cy’abagabo ntamunyarwanda wigeze uhatanamo, mu gihe umubiligi Remco Evenepoel usanzwe ukomeye muri iki cyiciro yongeye kwitwara neza nk’uko n’umwaka ushize byagenze, yegukana umwanya wa mbere akoresheje iminota 44 n’amasegonda 53.
Umutaliyani Ganna Filippo yabaye uwa kabiri naho umufaransa Seixas Paul aba uwa gatatu mu bakinnyi 60 barangije isiganwa, umwe gusa niwe utararisoje.
Ku wa Mbere tariki 21 Nzeri 2026 wari umunsi wa kabiri wa UCI Road World Championships, n’ubundi hakinwe icyiciro cyo gusiganwa n’ibihe ariko noneho mu bakobwa n’abahungu batarengeje imyaka 23.
Mu bakobwa basiganwe ku ntera ya kilometero 20.3, umunyarwandakazi warangirije hafi ni Mwamikazi Jazilla wasoreje ku mwanya wa 39 arushwa iminota 3 n’amasegonda 42, naho Byukusenge Mariate yasoreje ku mwanya wa 43 arushwa iminota 5 n’amasegonda 19.
Umunya-Australia Wilson-Haffenden Felicity niwe wabaye uwa mbere akoresheje iminota 27 n’amasegonda 40, akurikirwa n’umuholandi Vinke Nienke n’umubiligi Vierstraete Luca wabaye uwa gatatu mu bakinnyi 52 barangije irushanwa bose nk’uko bari baritangiye.
Mu bahungu basiganwe ku ntera ya kilometero 31.3, umunyarwanda rukumbi wahatanye muri iki cyiciro ni Nshutiraguma Kevin warangirije ku mwanya wa 53 arushwa iminota 5 n’amasegonda 15 n’uwabaye uwa mbere.
Umuholandi Gal Ryan yahize abandi akoresheje iminota 37 n’amasegonda 26, akurikirwa n’umutaliyani Milesi Nicolas n’umunya-Espagne Alvarez Hector wabaye uwa gatatu mu bakinnyi 67 barangije isiganwa, umwe niwe utararirangije naho abandi bane ntibaritangiye.
Umunsi wa 3 wa UCI Road World Championships ni uwo gutegereza uko abanyarwanda baraza kwitwara mu gihe bikiri ingorabahizi kubona umudari.
