Umuhanzi w’indirimbo zo kuramya no guhimbaza Imana, Israel Mbonyi, yateguje abakunzi be igitaramo cya gatatu yise “Icyambu Live Concert” azakora kuri noheri, tariki ya 25 Ukuboza 2024.
Ni ibitaramo Israel Mbonyi yatangiye mu mwaka wa 2022, aho yanditse amateka yo kuzuza inyubako ya BK Arena, yongera gukora igitaramo nk’iki muri 2023 nabwo kitabiriwe n’imbaga nyamwinshi.
Kuri iyi nshuro uyu muramyi abinyujije ku rubuga rwa Instagram yongeye kubaza abakunzi be niba biteguye iki gitaramo ku nshuro ya gatatu nk’uko akiteguye.
Muri Nyakanga 2024, Mbonyi yasohoye album yise ‘Nk’umusirikare’, ikubiyemo indirimbo zakunzwe, ndetse yahise ayimurikira Abanyarwanda batuye mu Bubiligi.
Muri uyu mwaka, Mbonyi yatangiye umushinga wo kwagura ibikorwa bye aririmba mu rurimi rw’igiswahili, ndetse yazengurutse mu bihugu bitandukanye akora ibitaramo ndetse akaba ateganya gukora n’bindi muri Afurika y’Epfo na Tanzania, ku itariki ya 2 n’iya 3 Ugushyingo 2024.
Israel Mbonyi umaze kwandika amateka mu muziki wo kuramya no guhimbaza Imana, yateguje abategereje igitaramo “Icyambu Live Concert” ko bazumva indirimbo ze zose zakunzwe mu bihe bitandukanye.
