Ikipe ya Sabah FK yo muri Azerbaijan yasezereye ikipe ya Kuopion Palloseura yo muri Finland mu ijonjora rya kabiri rya UEFA Champions League ku giteranyo cy’ibitego 3-0 harimo igitego cya rutahizamu Joy-Lance Mickels ukinira ikipe y’Igihugu y’u Rwanda ‘Amavubi’.
Mu ijoro ryo kuri uyu wa Kabiri tariki 28 Nyakanga 2026 nibwo ikipe ya Kuopion Palloseura yakiriye Sabah FK mu mukino wo kwishyura w’ijonjora rya kabiri ry’Irushanwa rihuza amakipe yabaye aya mbere iwayo ku mugabane w’Uburayi, UEFA Champions League.
Uyu mukino wabereye kuri Kuopio Football Stadium warangiye ikipe Sabah FK itsinze ibitego 2-0 harimo n’igitego cya Joy-Lance Mickels yatsinze ku munota 70.
Ibi bitego bibiri byaje bisanga intsinzi y’igitego 1-0 ikipe ya Sabah FK yari yarabonye mu mukino ubanza, bituma izamuka mu ijora rya gatatu rya UEFA Champions League.
Joy-Lance Mickels yafashije ikipe ya Sabah FK kwegukana igikombe cya Shampiyona ndetse anahiga abandi mu gutsinda ibitego byinshi muri iyi shampiyona ya Misli Premier League Season, aho yayitsindiye ibitego 19 mu mikino 25.
Joy-Lance Mickels w’imyaka 32 yamaze no kongera amasezerano y’imyaka ibiri muri iyi kipe, ndetse yihariye agahigo ko kuba ari we mukinnyi umaze kuyitsindira ibitego byinshi mu mateka yayo, yujuje igitego cya 73 mu mikino 140 amaze gukinira Sabah FK.
Mu ijonjora rya gatatu, ikipe ya Sabah FK izahura n’ikipe izakomeza hagati ya AGF yo muri Denmark na Lech Poznań yo muri Poland.
Umukino ubanza w’ijonjora rya gatatu uzakinwa tariki 4 cyangwa 5 Kanama, naho umukino wo kwishyura ukinwe tariki 11 Kanama 2026.
