Ku muhanda Kigali-Muhanga uturutse i Kigali mbere yo kugera mu santere ya Runda,i bumoso ku Ruyenzi mu Murenge wa Runda ho mu karere ka Kamonyi,ni ho hari gushyirwa sitasiyo bigaragara ko ishobora guteza akaga Abaturage.
Ni ku musozi utaringaniye ahari gushakirwa ikibanza cy’iyi station y’ibikomoka kuri petrole igiye kuhubakwa.Ikibanza izaterekwamo kubera ko hataringaniye ni igitaka cyazanywe kikarundwa kugeza gikoze umusozi w’itaka ari ho hejuru yacyo hari gushakirwa ikibanza.
Mu ntambwe nke hepfo gato y’iyi sitasiyo hari ingo z’abaturage imiyoboro y’amazi imanukiramo
Ikinyamakuru umunota.com cyasuye ahari gukorerwa iyi mirimo maze bamwe mu baturage bagaragaza impungenge z’iyi myubakire bari gukemanga.
Hirya gato hari urusengero,muri metero nke munsi ya wa musozi wabyawe n’igitaka cyarunzwe, hari izindi nzu z’abaturage ndetse amazi n’itaka bituruka ahari gukorerwa ibi bikorwa binyura muri izo ngo.
Imikuku y’iri taka ryarunzwe rikora umusozi inyura mu baturage
Bamwe mu batuye munsi y’uyu musozi w’igitaka wakozwe n’ubwo bagaragaza ko iki ari ikibazo giteye impungenge,ntabwo bifuje kuganira n’umunyamakuru ahubwo mu ijambo rimwe baravuga ngo “Ubuyobozi nabwo nta kuntu butabibona”
Cyakora abavuganye n’umunota.com bagaragaje ibi bishobora kuzagaragara nyuma.
Umwe yagize ati”Iyi sitasiyo iri kubakwa rero urabona ko bayikoreye umusozi w’igitaka bagiye kuyiterekaho.Ni ukuvuga ngo bariya batuye munsi yayo isaha n’isaha babangamirwa yaba amazi n’ibindi biyiturukamo byabamanukiraho”
Bafite impungenge z’uyu musozi wubatswe ruguru y’inzu z’abaturage
Undi yagize ati”Ese ko tujya twumva imodoka zabuze feri ziparitse zigateza impanuka,nawe reba ubu urabona imodoka yaruhukira he usibye kujya kugwa hejuru ya ziriya nzu z’abaturage?’
Umuyobozi w’akarere ka Kamonyi Dr.Nahayo Sylvere yabwiye umunota.com ko impungenge z’iyi Station zigaragara zatumye bajyayo nk’akarere kandi uyu rwiyemezamirimo akaba hari ibyo azabwa kugirango imirimo yo kuzamura inyubako za Station itangire.
Yagize ati”Hari ibyo twamusabye kutwereka byose mu bigaragara iyo abisobanura uko bizakorwa ubona ari ibintu bitateza ikibazo ku baturage.Ikindi ni uko iyo ubireba uri hakuno ugirango umusozi wamanutse ariko iyo uhegereye ubona ibitandukanye.Gusa hari ibyo asabwa gukosora kugirango umushinga we ukomeze neza”
Mayor avuga ko mubyo asabwa gukosora ari impungenge zo mu gihe cy’imvura bityo agasabwa kwerekana uko bizakorwa kugirango imirimo ye yihute hamwe no kugaragaza ibipimo byerekana ko hariya mu buryo bw’imyubakire nta kibazo kandi bimwe amaze kubyerekana.
Ubuyobozi buvuga ko hazabanza kugenzurwa byose neza no gukuraho izi mpungenge kugirango noneho uyu rwiyemezamirimo wubaka Iyi station abone kwemererwa kubaka.
