U Rwanda rugiye kwakira Inama Mpuzamahanga yita ku mutekano muri Afurika (ISCA), izahuza abayobozi n’inzobere mu by’umutekano, abafata ibyemezo n’abashakashatsi bazaganira ku ngaruka z’izamuka ry’ikoranabuhanga ryigenga ku mutekano muri Afurika.
Ni inama izaba ku wa 12 Kanama 2026 izabera i Kigali mu Rwanda.
Biteganyijwe ko izitabirwa n’abayobozi mu nzego z’ingabo n’umutekano, abashyiraho politiki, abahagarariye imiryango mpuzamahanga n’akarere n’ibigo by’ubushakashatsi, baturutse mu bihugu birenga 50.
ISCA 2026 izaba ifite insanganyamatsiko igira iti “ Ukwiyongera kw’ikoranabuhanga ryigenga: Ingaruka ku bwirinzi n’umutekano muri Afurika”.
Abazitabire iyi nama bazaganira ku ikoreshwa rya drones, ubwenge buhangano (AI) n’izindi tekinoloji zikora ibikorwa mu buryo bwigenga zirimo guhindura imikorere y’ingabo n’umutekano ku mugabane wa Afurika.
Umuyobozi Mukuru wa ISCA, Amb. Lt Gen (Rtd) Frank Mushyo Kamanzi, yavuze ko ikoranabuhanga ryigenga ritakiri ibintu bizabaho mu gihe kizaza, ahubwo ko risanzwe rihindura imiterere y’ibibazo by’umutekano n’uburyo ingabo zikoramo.
Yagize ati “Ikoranabuhanga ryigenga ntirikiri ibintu bishoboka gusa mu gihe kizaza; risanzwe rihindura uburyo ibibazo by’umutekano bivuka, ndetse n’uburyo ubushobozi bw’igisirikare buboneka kandi bukoreshwa.”
Yakomeje agira ati “Afurika igomba kugira uruhare mu kuyobora izi mpinduka ishyiraho politiki ireba ahazaza, imiyoborere ishingiye ku kubazwa inshingano, kandi ishora imari mu ikoranabuhanga ryayo no mu guteza imbere ubushobozi bw’abaturage bayo.”
ISCA ivuga ko igabanuka ry’ibiciro by’izi tekinoloji, kuba ziboneka ku isoko rusange ndetse n’uburyo zishobora guhindurwamo imikoreshereze mishya byatumye zitangira gukoreshwa n’ingabo za Leta, ibigo by’abikorera bikora ibikorwa bya gisirikare ndetse n’amatsinda atari aya Leta.
Muri iyi nama hazaba ibiganiro bibiri bizasesengura uko ikoranabuhanga ryigenga rihindura imiterere y’umutekano muri Afurika, amahirwe n’imbogamizi rishobora guteza, amakimbirane hagati y’ibihugu amategeko agenga ikoreshwa ryaryo ndetse n’uburyo ibihugu bya Afurika byakwihutisha iterambere mu kubaka ubushobozi bwabyo mu ikoranabuhanga.
ISCA ivuga ko intego y’ibi biganiro ari ugutanga umurongo wa politiki wafasha ibihugu bya Afurika gukoresha iri koranabuhanga mu buryo bwizewe, mu gihe bikomeza kurinda ubusugire bw’ibihugu, ubufatanye n’ubushobozi bwo kwirinda ibibazo by’umutekano.
Inama iheruka kuba yabereye mu Rwanda ku wa 19-20 Gicurasi 2025.
