Batembagaye! G-Tuff yemeje ab’i Kigali muri Gen-Z Comedy Show isoza Kanama 2025 (Amafoto)

G-Tuff ni we washyize akadomo ku gitaramo cya Gen-Z Comedy Show gisoza ukwezi kwa Kanama 2025.

Uburyo abara inkuru, uko aseka, ananyuzamo asoma kuri ka mukaru ke aba yitwaje, bituma abamureba banyurwa.

Yavuze ku nkuru zitandukanye zirimo iz’abahanzi akunda mu Rwanda, izo muri Bibiliya, Amavubi yihebeye n’ibindi.

Mu butumwa bukomeye yakomojeho, G- Tuff yibukije urubyiruko kwirinda kwishora mu bishuko no kwijandika mu biyobyabwenge.

Yagize ati “U Rwanda rwacu rubuze urubyiruko, twaba tubuze imbaraga, twaba tubuze ahazaza h’Igihugu. Muri mu kinyejana cy’umuriro, mujye mwibuka Kunywa Less.’’

Buri nkuru G-Tuff yakomojeho yatumaga abatari bake bamwenyura, bagakoma amashyi mu kwerekana ko banyuzwe n’uburyo yabaganirije.

Umuhanzi Jules Sentore yasogongeje abitabiriye igitaramo Gen-Z Comedy Show kuri album ye nshya yise “Umudende”.

Iyi album iriho indirimbo 12 zatekerejweho mu gukomeza guha agaciro umuco gakondo w’u Rwanda.

Yabwiye urubyiruko ko rufite umukoro wo kuzirikana no gukunda Injyana Gakondo. Ati “Igikuru ni ukugikunda, ugakunda wowe ndetse ukanikunda.’’

Muhinde yavuze ku nkuru zitandukanye zirimo izo yifashishije amafoto ari kumwe n’ibyamamare nka Okkama n’Umuvugizi w’Urwego rw’Igihugu rw’Ubugenzacyaha, RIB, mu kwerekana ko izina rye ryagutse.

Yakomoje ku buryo buzajya bukoreshwa mu kogeza umukino wa Police FC na RIB FC, nizaba yashinzwe, hagendewe ku byo izi nzego zikora.

Agiye gusoza, Muhinde yahamagaye Tuyishime Sénégalais amwifuriza isabukuru nziza y’amavuko.

Pilote mu kubara inkuru ze anashyiramo amasomo yigisha.

Yakomoje ku nkuru yavuzemo ko aho gutanga ibihumbi 100 Frw ushaka umuntu wigana ijwi ry’inkoko, wagura inkoko y’ibihumbi 10 Frw igatanga iry’umwimerere. Ati “Warangiza ukayirya.”

Yanavuze ku bakerenshe Igitabo cya Miss Nishimwe Naomie, ashimangira ko akwiye kwigirwaho kuko yitinyutse, akandika ku buzima bwe.

Inkirigito Clement ni umwe mu banyarwenya amaze kuzamura izina ryabo binyuze mu nganzo ye yo kubara inkuru zitandukanye mu buryo bumworoheye.

Yifashishije inganzo ye yo kuririmba abara inkuru zinyuranye.

Umuhanzi wihebeye Injyana Gakondo, Jules Sentore, witabiriye iseka rusange yasabwe kwivuga, ahuza amagambo atandukanye aganisha ku kwivuga ahereye ku bisekuru bye, yishimirwa cyane.

Kepa Nyirudushya uturuka mu Karere ka Nyaruguru yigishije ntibavuga, bavuga binyuze mu kwigisha Ikinyarwanda cy’umwimerere.

Yavuze ku nkuru z’umupfumu wabuze abakiliya, amugisha inama, na we amubwira ko yajya abikora nk’ubwiriza ubutumwa bwiza kugira ngo abiyegereze.

Ishimwe Joseph yinjiye ku rubyiniro nk’umuririmbyi ariko ataha nk’umunyarwenya.

Yavuze ku nkuru zirimo iz’abahanzi b’abaraperi bakoresha amagambo atumvikana ariko bo bakayaha ibisobanuro. Yifashishije ingero z’indirimbo zirimo iza Alyn Sano na Bushali n’izindi nka ‘Tsunami’ ya RunUp.

Abanyarwenya Musa na Kandi barahuza, bagatanga ibyishimo mu bitabiriye Igitaramo cya GEN-Z Comedy Show.

Inkuru zabo bazikubiye mu zirimo kogeza umukino wa Rayon Sports na Musanze FC ariko bisanishije na Pasiteri witwa Ndamayize Matayo ubwiriza anyuzamo agasirimba cyane.

Bavuze ko abakinnyi 11 ba Rayon Sports ari ABAZUNGU, benshi baraturika baraseka. Bungamo ko ibintu bya Gikundiro byose biganisha ku “kanyenyeri” n’iyo amafaranga yatangwa mu ntoki.

Umunyarwenya Isacal yavuze ku nkuru y’uburyo umukoresha we Fally Merci, atabyibushye ariko atanamurusha amafaranga.

Lucky Baby ni umunyarwenya umaze kuzamura izina kubera ubuhanga bwe mu gusetsa.

Yavuze ku nkuru zirimo izerekeye imyitwarire y'ababyeyi be barota bavuga ibyo biriwemo n'uko Burikantu na Buringuni cyangwa Dj Briane na Tesha bazitwara nibamara gusaza, bageze mu cyiciro cyo guha agaciro umuco Nyarwanda.

Umunyarwenya Fally Merci washinze Gen-Z Comedy Show yanyuzwe n’impano z’abana bibumbiye mu Itsinda ryitwa ‘Tomorrow Kids’,

Aba bana bashimishije benshi binyuze ku kubyina indirimbo z’abahanzi batandukanye mu Rwanda nka Diez Dolla n’abana babarizwa muri Sherrie Silver Foundation.

Eric w’i Rutsiro yavuze uburyo yavuye i Rutsiro yambara inkweto za ‘boda boda’ ariko kuri ubu akaba asigaye yambara inkweto za Jordan.

Yavuze inkuru z’uburyo asigaye arusha ikipe y’Akarere ke, Rutsiro FC kwamamara cyane, ariko atabikoresha yirata.

Igitaramo Gen-Z Comedy Show cyatangiwe n’abanyarwenya bakizamuka, na bo bifuza amahirwe yo kwaguka no kwerekana inganzo yabo irushaho kugera kuri benshi.

Muri bo harimo n’abashya bataramiye muri iki gitaramo cyitwa “Iseka Rusange” nka Dede, Jonathan na Masamba.

Fally Merci yageze ku rubyiniro atanga ikaze ku bitabiriye igitaramo cya GEN Z Comedy Show gisoza ukwezi kwa Kanama 2025.

Ab’inkwakuzi bafashe ibyicaro hakiri kare, biteguye Igitaramo cya Gen-Z Comedy Show bari aho bashobora kwitegera abanyarwenya neza nta kibatangira.

Buri wese yaserutse mu mwambaro umubereye w’ibirori, umwe yambara hose bakamureba, ashaka gutarama mu buryo bwuzuye.

Abagore ndetse n'abakobwa batuye mu mujyi wa Kigali babukereye, biteguye guseka uyu mugoroba

Famille Buryohe imaze kuenyerwa ku mbuga nkoranyambaga byumwihariko Youtube, aho bazwi cyane bigisha ibijyanye n'umuryango, ni bamwe mu bitabiriye Gen-Z Comedy isoza Kanama

Kuri uyu wa kane, tariki ya 28 Kanama 2025, ni umunsi wa nyuma w'ukwezi kwa Kanama, Abanya-Kigali bakunda urwenya baraba bateraniye muri Camp Kigali, aho bitabiriye Iseka rusange rya Gen-Z Comedy.