Udushya n’ibihe byaranze Kwita Izina: Dore uko umuhango wagenze (Amafoto)

Minisitiri w'Intebe yashimye abaturage ba Musanze ku musanzu wabo mu gusigasira ingagi no guteza imbere ubukerarugendo mu gihugu cy'u Rwanda.

Yakomeje abashishikariza gukomeza kubyaza umusaruro ibikorwaremezo bikikije Pariki y'Ibirungu, ndetse n'imishinga igamije guteza imbere imibereho yabo.

Ati" Muhore muzirikana ko ari umutungo w'agaciro kanini dufite, kandi tugomba gusigasira twese."

Minisitiri w'Intebe akaba ari nawe wari umushyitsi mukuru niwe usoje ibirori byo Kwita Izina byaberaga mu Kinigi mu Karere ka Musanze.

Yakomoje kandi kuri gahunda yo kwagura Pariki y'Ibirunga, ati " Bizafasha ingagi zacu gukomeza kubaho neza mu buryo burambye."

Umuyobozi Mukuru w’Urwego rushinzwe Iterambere mu Rwanda (RDB), Jean Guy Afrika, avuga ko kuva ghubda yo gusaranganya inyungu ziva mu bukerarugendo yatangira mu myaka 20 ishize, imishinga ifite agaciro ka miliyari 18frw yazanye ibikorwaremezo bitandukanye.

Ati “ Uyu munsi wo kwita wo Kwita abana b’ingagi 20, ni ishema ry’igihugu cyacu. Murabiziko kuva gahunda yo gusaranganya inyungu ziva mu bukerarugendo yatangira mu myaka 20 ishize, 10% by’umusaruro wa Pariki ujya mu mishinga y’abaturage baturiye Pariki.”

Kugeza ubu imishinga ifite agaciro ka miliyari 18 Frw, yazanye amashuri ,amavuriro, amasoko n’inzu zo guturamo.

Yongeyeho ko kubungabunga urusobe rw’ibinyabuzima, bizana umusaruro n’inyungu mu mibereho myiza y’abaturage.

Umuhanzi w’Umunya-Nigeria Yemi Eberechi Alade wamamaye nka Yemi Alade ni umwe mu bise izina abana b’ingagi mu muhango wabaye ku wa 5 Nzeri 2025, yise umwana w’ingagi izina rya’ Kundwa’.

Umwana yahaye izina, nyina ni Mbaraga , akaba yaravutse kuwa 1 Gicurasu 2025, akaba avuka mu muryango witwa IGISHA .

Uyu muhanzi yaherukaga mu Rwanda mu 2023, ubwo yari yaje mu gikorwa cyo guhemba abanyamuziki, ibihembo bya Trace Awards yanahawemo igihembo.

Yemi Yalade arazwi cyane muri Afurika kubera indirimbo ze zafashe imitima y’abatari bacye zirimo , ‘Johnny’ , "Despacito" n’izindi.

Mu 2017, yabaye umuhanzi wa mbere mu mateka y’umuziki wa Afurika mu cyiciro cy’abagore ufite indirimbo yarebwe inshuro nyinshi kurusha izindi ku rubuga rwa YouTube.

Indirimbo nka ‘Johnny’ yabaye iya mbere mu ndirimo z’abahanzi bose b’abagore ku Mugabane wa Afurika zarebwe inshuro nyinshi ku rubuga rwa YouTube, aho yarebwe n’abarenga miliyoni 73.

Icyiciro cya kabiri cy'abashyitsi bise abana b'ingagi amazina ni:

1. Yemi Alade: Yise ingagi izina rya “Kundwa”
2.Reed Oppenheimer: Yise ingagi izina rya “Tengamara”
3.Athanasie Mukabizimungu: Yise ingagi izina rya “Cyubahiro”
4.Dr. Edward Hult: Yise ingagi izina rya “Rwandanziza”
5.Susan Sinegal: Yise ingagi izina rya “Muvugizi”
6.Gagan Gupta: Yise ingagi izina rya “Mpinganzima”
7.Camille Rebelo: Yise ingagi izina rya “Rugano”
8.Luis Garcia: Yise ingagi izina rya “Iraba”
9.Bacary Sagna: Yise ingagi izina rya “Amahumbezi”
10.Xi Zhinong: Yise ingagi izina rya “Izere”
11.Lee Ehmke: Yise ingagi izina rya “Shyamba”
12.Susan Chin: Yise ingagi izina rya “Cyerekezo”
13.Javier Pastore: Yise ingagi izina rya “Ganza”
14.Ruth Fisher: Yise ingagi izina rya “Inkomoko”
15.Vivien Ressler: Yise ingagi izina rya “Higa”
16.Niyonzima Jean de Dieu: Yise ingagi izina rya “Terimbere”

Icyiciro cya mbere cy'abaje kwita izina abana b'ingagi bahamagawe imbere aho bagiye gutangira kwita ingagi amazina.

Abo ni:

1. Princess Ingeborg Zu Schleswig-Holstein yise umwana w'ingagi "Burere"

2. Schleswig-Holstein yise ingagi izina rya "Ntarungu"

3. Umujyanama Mukuru w'Umuyobozi Mukuru w'Ishami ry'Umuryango w'Abibumbye ryita ku buzima, Senait Fisseha yise ingagi " Ntarungu"

4. Umuyobozi Mukuru wa Global Green Grwoth Instituation, Sang-Hyup Kim yise ingagi "Impuguke"

5. Umuyobozi mukuru w’Inama y’Ubutegetsi ya Marriott International Inc, David S. Marriot, yise ingagi "Urugwiro"

6. Umuyobozi Mukuru wa BGI Group, Dr.Yin Ye, yise ingagi "Tekana"

7. Uwashinze akaba n'umuyobozi mukuru wa Tusk Trust, Charlie Mayhew OBE, yise ingagi "Ntavogerwa"

8. Umuyobozi w'abarinda ndetse n'abayobora ba mukerarugendo muri Pariki y’Igihugu ya Nyungwe, Claver Ntoyinkima yise ingagi " Nyunganizi"

9. Umunyamerika uyobora agatunganya n'amafilime, Michael Bay, yise umwana w'ingagi "Umurage"

10. Umukinnyi wa filime akaba n'Intumwa yihariye ya UNDP, Michelle Yeoh Todt, yise umwana w'ingagi "Rwogere"

11. Intumwa yihariye y’Umunyamabanga Mukuru w’Umuryango w’Abibumbye ishinzwe umutekano wo mu muhanda, Jean Todt yise umwana w'ingagi "Ruvugiro"

12. Umwe mu bashinze Global Infranstructure Partners, Matthew Harris, yise umwana w'ingagi "Mwungeri"

13. Umuhanzi ukomoka i Burundi, Khadja Nin, yise umwana w'ingagi "Garuka"

14. Umwe mu bashinze GFBiochemicals akaba yarakiniye n'ikipe ya Arsenal, Mathieu Flamini yise umwana w'ingagi "Rubuga"

15. Umuhanzi Somi Kakoma yise umwana w'ingagi "Iwacu"

Itorero Mashirika riri gususurutsa abitabiriye umuhango wo KwitaIzina20, mu mbyino, indirimbo ndetse n'ibyivugo bigendanye n'insanganyamatsiko y'uyu mwaka.

Iyi nsanganyamatsiko igira iti "Umurage wo kubungabunga urusobe rw'ibinyabuzima ushingiye ku baturage baturiye Pariki y'Ibirunga."

Guverineri w’Intara y’Amajyaruguru, Mugabowagahunde Maurice, avuga ko abaturage bo mu Ntara y’Amajayaruguru n’abo mu Burengerazuba, bashima umushinga wo kwagura Pariki y’Ibirunga ndetse ko bizeye ko izagira uruhare mu iterambere ry’abatuye izi ntara.

Mugabowagahunde yavuze kandi ko kuba uyu muhango ubera muri iyi ntara ari ibintu by’agaciro.

Ati “Kuba uyu muhango wo Kwita Izina ubera mu ntara y’Amajayaruguru, ni ishema ni icyubahiro by’iyi ntara yacu. Ni umwanya twe dufata tuzirikana umutungo kamere dufite ari zo ngagi zo mu birunga, ingagi zifite uruhare rukomeye mu kuduteza imbere no guteza imbere igihugu cyacu.”

Guverineri avuga ko mu rwego rwo gusaranganya umusaruro ukomoka ku bukerarugendo, abaturage baturiye iyi pariki bubakiwe amazu, bahabwa amatungo, bubakirwa ibikorwaremezo birimo amashuri, amavuriro n’ibindi.

Avuga ko mu rwego rwo gusaranganya uyu musaruro, abaturiye iyi Pariki kuva iyi gahunda yatangira, imishinga 695 yatewe inkunga ingana n’amafaranga Miliyari esheshatu na miliyoni 800 mu mirenge 12 irimo pariki y’Ibirunga.

Umushyitsi Mukuru w’ibi birori, Minisitiri w’Intebe, Dr Nsengiyumva Justin yamaze kugera ahari kubera ibirori byo #KwitaIzina20.

Nyuma yo kwakira umushyitsi mukuru, haririmbwe indirimbo yubahiriza igihugu.

Madamu Jeannette Kagame, yamaze kugera ahabera ibi birori bidasanzwe byo kwita Izina abana 40 b’ingagi barimo 18 bavutse mu mwaka ushize.

Uyu muhango byari biteganyijwe kuba mu mwaka ushize ariko uza gusubikwa nkuko byatangajwe n’Urwego rw’Igihugu rw’iterambere, RDB.

Umushyushyarugamba, Lion Manzi na Makeda wakunze kugaragara mu itangazamakuru nibo bari gususurutsa no gufasha kuyobora ibi birori byo #KwitaIzina20

Abayobozi batandukanye barimo abayobora ibigo bya Leta, ba Minisitiri, ba Ambasaderi n'abandi bitabiriye umuhango wo Kwita Izina abana b'Ingagi ku nshuro ya 20.

Bruce Melodie uri mu bahanzi bafite izina rinini mu Rwanda, yongeye gushimangira ko akunzwe n'ab'ingeri zose.

Uyu muhanzi waserutse mu mwambaro udasanzwe, yari kumwe n'abasore n'inkumi bamufasha kubyina no gususurutsa ibihumbi by'abitabiriye ibirori byo #KwitaIzina20.

Si Melody gusa kuko n'abarimo Ariel Wayz nawe ukunzwe mu Rwanda basusurukije iyi mbaga yateraniye mu Kinigi.

Abashyitsi bakomeye barimo n'abagiye kwita izina abana b'ingagi 40, bageze mu Kinigi ahagiye kubera umuhango wo #KwitaIzina20

Mu bagomba kwita izina harimo umuhanzi ukomoka muri Nigeria, Yemi Alade, umukinnyi wakiniye Paris Saint Germain ukomoka muri Argentine, Javier Pastore, umukinnyi Mathieu Flamini wakiniye Arsenal, Igikomangoma cya Malaysia, Tunku Ali Redhauddin ibni Tuanku Muhriz n'abandi.

Abahanzi barimo Eric Senderi basusurukije abateraniye mu Kinigi ahagiye kubera umuhango wo #KwitaIzina20.

Umuraperi Kivumbi King uri mu bagezweho nawe yataramiye ibihumbi by’abitabiriye ibi birori mu ndirimbo ze zirimo ‘Wait, Ola, Hanze n’izindi.

Urabona ko akanyamuneza ari kose mu baturage bakereye ibi birori bimaze kuba ubukombe.

Ku bari kugera muri aka gace, hari ahantu hubatswe inzu za Kinyarwanda, hatatswe mu buryo gakondo, hashyizwe ibirimo ibiseke, ibisabo, hari amata n'ibindi.

Ababyeyi bari gucunda, abana bagahabwa amata, abasore b'ibigango bafite ingabo n'ibindi bikoresho, byerekana imibereho y'Abanyarwanda kuva mu myaka yo hambere

Mbere y’ibirori byo #KwitaIzina20 bigiye kubera mu Kinigi kuri uyu munsi, abashyitsi bari bwite amazina abana b’ingagi babanje gutemberezwa muri Pariki y’Igihugu y'Ibirunga kureba abana b’ingagi bari buze guha amazina.

Muri ibi birori bigiye kubera mu Kinigi ho mu Karere ka Musanze, abana b’ingagi 40, barimo 18 bavutse mu 2024, ni bo bari buhabwe amazina.

Ibihumbi by'abaturage baturutse mu Karere ka Musanze Nyabihu, Rubavu n'ahandi hirya no hino mu gihugu bageze mu Kinigi ahagiye kubera umuhango wo Kwita Izina ku nshuro ya 20.

Abaturutse batangiye kugera mu Kinigi guhera ku isaha ya saa kumi n'ebyiri (06:00), ndetse ibyishimo ni byose, aho bari kuririmba ndetse banabyina.

Imihanda iruzuye, abantu b'ingeri zitandukanye baturutse hirya no hino mu gihugu ndetse n'imahanga berekeje mu Kinigi ahagiye kubera ibirori nyirizina byo Kwita Izina ku nshuro ya 20.