Ku mugoroba wo kuri uyu wa Gatandatu tariki 20 Kamena 2026 nibwo ikipe ya APR FC yatangaje ko yasinyishije umukinnyi ukina asatira izamu, Amani Kouadiokan Michel Breygeneve ukomoka muri Côte d’Ivoire.
Uyu mukinnnyi akaba yasinye amasezerano y’imyaka ibiri avuye mu ikipe ya AFAD Djékanou yo mu cyiciro cya mbere iwabo muri Côte d’Ivoire.
APR FC yatangaje ko Amani azajya yambara nimero 17, iyi nimero ikaba yarisanzwe yambarwa na myugariro w’iyi kipe Niyigena Clement, ibi nabyo bitanga ibimenyetso ko uyu myugariro ashobora kuzayisohokamo.
Amani ni umukinnyi w’imyaka 27 kuko yavutse tariki 6 Mata 1999, akaba afite santimetero (Cm) 180.
APR FC akaba ariyo kipe ya mbere yo hanze y’iwabo agiye gukinira kuko mu yandi makipe yakiniye harimo Williamsville AC na Étoile du Sanwi d’Aboisso.
Muri uyu mwaka urangiye w’imikino, Amani yitwaye neza dore ko ibitego 17 yatsinze muri Shampiyona byamugize umukinnyi wa mbere watsinze ibitego byinshi muri iyi Shampiyona.
Mu mikino ine ya CAF Confederation Cup uyu mukinnyi yakinnye, yatsinzemo ibitego bibiri, atanga umupira umwe wavuyemo igitego, aho ikipe ya AFAD Djékanou yakiniraga yaviriyemo mu ijonjora rya kabiri isezerewe na USM Alger
Amani Kouadiokan Michel Breygeneve abaye umukinnyi wa kabiri ikipe ya APR FC itangaje ko yasinyishije nyuma ya Ishimwe Christian yasinyishije avuye muri Police FC, aba umukinnyi wa mbere w’umunyamahanga usinyiye iyi kipe y’Ingabo z’u Rwanda iherutse kwegukana igikombe cya Shampiyona mu makipe yo mu Rwanda, BK Pro League National Champions, igikombe cy’Amahoro n’igikombe cy’Intwari.
APR FC itangiye gusinyisha abakinnyi nyuma yo gutandukana n’abakinnyi bane kugeza ubu barimo uwari kapiteni wayo Niyomugabo Claude n’abanyamahanga batatu aribo Aliou Souané, Mamadou Sy na Mahamadou Lamine Bah.
Biravugwa ko hari n’abandi bakinnyi bari mu muryango usohoka muri APR FC nk’uko hari abakinnyi bashya bategerejwe muri iyi kipe.
