Kuri uyu wa Gatanu, Minisitiri wa Siporo, Nelly Mukazayire yashyikirije ibendera ry’igihugu ikipe ya RSSB Tigers, mu gihe bitegura kwerekeza mu Bushinwa kwitabira irushanwa rya FIBA Intercontinental Cup ry’umwaka wa 2026, rizaba hagati ya tariki ya 22 n’iya 27 Nzeri.
Nk’ikipe yatwaye igikombe cya Basketball Africa League mu 2026, RSSB Tigers izahagararira Afurika muri iri rushanwa rihuza amakipe meza kurusha ayandi yo ku migabane itandukanye.
Minisitiri Mukazayire yifurije iyi kipe amahirwe masa, anayishishikariza gukomeza kugira imbaraga, gushyira umutima ku mukino no guharanira intsinzi kugeza umukino urangiye. Iyi kipe yasezeranyije kuzakora ibishoboka byose mu kibuga mu gihe ihagarariye u Rwanda na Afurika.
Umuyobozi Mukuru w’Urwego rw’Ubwiteganyirize mu Rwanda, RSSB, Regis Rugemanshuro, yavuze ko ikipe y’iki kigo ya RSSB Tigers izajya muri 2026 FIBA Intercontinental Cup itagiye kwitabira gutyo gusa ahubwo izaba igihe gutsinda ngo itware igikombe.
RSSB Tigers izahagararira Afurika mu irushanwa ry’uyu mwaka rya FIBA Intercontinental Cup rihuza amakipe yabaye aya mbere ku migabane yayo, nyuma y’uko yegukanye igikombe gihuza ayabaye aya mbere muri Afurika, Basketball Africa League, BAL 2026.
RSSB Tigers yabaye ikipe ya mbere yo mu Rwanda no mu karere k’Iburasirazuba muri rusange yegukanye igikombe cya BAL, biba intambwe idasanzwe ku ikipe yashinzwe muri 2019 nyuma ikagurwa na RSSB muri 2025.
FIBA Intercontinental Cup izakinwa kuva tariki 22 kugeza tariki 27 Nzeri 2026, ibere i Beijing mu Bushinwa, yitabirwe n’amakipe 6 arimo RSSB Tigers, Boca Juniors yo muri Amerika y’Amajyepfo, Rytas y’i Burayi, Beijing Royal Fighters yo mu Bushinwa, Shanghai Sharks nayo yo mu Bushinwa na NBA G League United.
RSSB Tigers yatwaye BAL 2026 iba iya mbere igitwaye mu Rwanda
