Minisiteri y’Uburinganire n’Iterambere ry’Umuryango igaragaza ko akarere ka Gisagara na Nyamagabe na Kamonyi tuza ku isonga mu kugira umubare munini w’abana bari mu mirire mibi mu ntara y’Amajyepfo, bamwe mu bayobozi bayobora utu turere bo bakavuga ko bagiye gushyira imbaraga mu gukemura iki kibazo.
Mu nama yiga ku kibazo cy’igwingira n’imirire mibi mu ntara y’Amajyepfo yahurije hamwe inzego zitandukanye yagaragaje ko iki kibazo ari kimwe mu bihangayikishije.Umuyobozi ushinzwe guhuza ibikorwa bya CLADHO akaba n’umugenzuzi Murwanashyaka Evariste agaragaza zimwe mu mpamvu zituma hari tumwe mu turere dufite umubare mwinshi w’abana bagwingiye.
Yagize ati”Bamwe muri bo bafite ikibazo cy’imyumvire mu rwego rwo kutamenya no gutegurira abana indyo yuzuye”
Bamwe mu bayobozi bayobora uturere dufite abana benshi mu kugira igwingira n’imirire mibi turimo Gisagara, Nyamagabe na Kamonyi bavuga ko bagiye gufata ingamba zigamije kurandura burundu iki kibazo.
Rutaburingoga Jerôme uyobora akarere ka Gisagara yagize ati”Twabaruye imiryango yose ifite icyo kibazo cy’imirire mibi kugirango iyo miryango tuyiteho”
Umuyobozi w’akarere ka Kamonyi Dr. Nahayo Sylvere na we yagize ati”Nibyo ni ikibazo dufite kandi dufatanyije tugiye gushyiramo imbaraga ku buryo imibare izagabanuka bigaragarira buri wese”
Minisitiri w’Uburinganire n’iterambere ry’umuryango Uwimana Consolée avuga ikibazo cy’imirire mibi n’igwingira atari ikibazo cy’ubuzima gusa ahubwo bigira ingaruka ku iterambere ry’abaturage n’igihugu, ndetse n’ejo hazaza hacyo, bityo hakenewe ubufatanye bwa buri wese, asaba uturere twasubiye inyuma kwisuzuma no kwigira kutwateye imbere mu kurigabanya.
Yagize ati”Kurwanya igwingira n’imirire mibi si inshingano y’umukozi ubishinzwe ahubwo ni inshingano ya buri muyobozi wese bityo tubigire intego”
Ibarura riheruka ku mibereho myiza y’abaturage ryerekana ko igwingira ryavuye 33% ryariho mu mwaka wa 2015-2020 rigera kuri 27% kuva 2020-2025 mu gihugu, gusa abana benshi bagaragarwaho igwingira mu ntara y’Amajyepfo bakaba biganjemo abavutse ku bangavu batewe inda imburagihe.
Gisagara ubu ni yo ifite umubare mwinshi w’abagwingiye naho Ruhango ikaza ku isonga mu kugabanya umubare kuko yagabanyijeho 16%.
Abayobozi b’uturere tw’amajyepfo n’abandi bafatanyabikorwa barebeye hamwe ikibazo cy’igwingira n’imirire mibi
