Perezida Kagame yaganiriye n’Umuyobozi Mukuru wa Yonsei University, Prof. Dong-Sup Yoon wari kumwe na Dr. Won-Yong Lee, Umuyobozi Mukuru wungirije ushinzwe Ubushakashatsi, baganira ku buryo bwo guteza imbere uburezi binyuze mu guhererekanya ubumenyi.
Umuyobozi w’Igihugu yakiriye muri Village Urugwiro aba bayobozi bavuye muri Yonsei University, kuri uyu wa Kabiri, tariki ya 27 Mutarama 2026.
Ibiganiro bagiranye byibanze ku gushimangira no gukomeza ubufatanye hagati ya Kaminuza ya Yonsei n’u Rwanda, binyuze mu guhanahana ubumenyi mu by’amashuri makuru na za kaminuza, guteza imbere ubushakashatsi, ndetse no kongerera ubushobozi urwego rw’uburezi.
Muri 2024, Iyi Kaminuza yo muri Koreya y’Epfo yari yahaye Perezida Paul Kagame Impamyabumenyi y’Ikirenga (PhD) y’icyubahiro, mu Ishami ry’Imiyoborere rusange (Public policy and Management).
Icyo gihe Perezida Kagame yashimiye iyi Kaminuza agaragaza ko yari intangiriro y’imikoranire myiza hagati yayo n’u Rwanda, ku nyungu z’Abanyarwanda n’Abanya-Koreya muri rusange.
Mu Nzeri 2025, nabwo Kaminuza y’u Rwanda na Yonsei University bashyize umukono ku masezerano agamije kwagura imikoranire mu nzego zitandukanye z’uburezi n’ubushakashatsi.
Yonsei University ni imwe muri Kaminuza eshatu zikomeye muri iki gihugu, kimaze gutera imbere mu bukungu bushingiye ku bumenyi, ndetse ikomeye no ku rwego rw’Umugabane wa Aziya.
Yonsei yashinzwe mu 1885, ikaba imaze gushinga ibigo by’ubushakashatsi bigera ku 178 mu nzego zitandukanye.
