Perezida Paul Kagame yagizwe Umuyobozi Mukuru wa Komisiyo nshya y’Umuryango w’Abibumbye ishinzwe guteza imbere ikoreshwa ry’ubwenge buhangano (AI) ku rwego mpuzamahanga, AI for Good Global Commission.
Ni komisiyo nshya yashyizweho n’Ikigo cy’Umuryango w’Abibumbye gishinzwe Ikoranabuhanga mu Itumanaho (ITU) ku bufatanye n’Umuryango w’Abibumbye, igamije guteza imbere ikoreshwa ry’ubwenge buhangano mu guteza imbere imibereho y’abaturage ku Isi.
Iyi komisiyo yashinzwe mu gihe ibihugu byinshi bikomeje gushora imari mu ikoranabuhanga rya AI, hagamijwe ko ryakoreshwa mu gukemura ibibazo byugarije Isi birimo ubukene.
Iyi Komisiyo izashyira imbaraga mu gutuma iri koranabuhanga rikoreshwa mu buryo buboneye, bwizewe kandi burengera uburenganzira bw’ikiremwamuntu.
Perezida Kagame azafatanya kuyobora iyi komisiyo na Marc Benioff, washinze akanayobora sosiyete ya Salesforce, imwe mu zikomeye ku Isi mu bijyanye n’ikoranabuhanga mu gihe Umunyamabanga Mukuru wa ITU, Doreen Bogdan-Martin, azaba Umuyobozi Wungirije w’iyi komisiyo.
Komisiyo ya AI for Good Global Commission igizwe n’abanyamuryango 44 barimo abakuru b’ibihugu, abayobozi b’imiryango mpuzamahanga, abashakashatsi n’abayobozi b’ibigo bikomeye by’ikoranabuhanga ku Isi.
Mu bagize iyi komisiyo harimo kandi abayobozi ba Microsoft, NVIDIA, Amazon, Anthropic, Accenture na Cohere, bazafatanya gutanga umurongo ku buryo AI yakwifashishwa mu nyungu rusange.
Mu nshingano z’iyi komisiyo harimo gutanga inama ku mikoreshereze ya AI ku rwego mpuzamahanga, guteza imbere ubufatanye hagati ya za Guverinoma, ibigo by’ikoranabuhanga n’imiryango mpuzamahanga.
Harimo kandi gufasha ibihugu bikiri mu nzira y’amajyambere kubyaza umusaruro AI, ndetse no gushyiraho amahame azatuma ikoreshwa ryayo ritabangamira uburenganzira bwa muntu cyangwa ngo riteze ibindi bibazo.
Iyi komisiyo kandi izareba uburyo AI yakwihutisha ishyirwa mu bikorwa ry’Intego z’Iterambere Rirambye (SDGs), binyuze mu guteza imbere serivisi z’ubuzima, uburezi, ubuhinzi, guhangana n’imihindagurikire y’ibihe no kongera amahirwe y’ubukungu ku baturage.
Kuba Perezida Kagame yagizwe Umuyobozi Mukuru wa AI for Good Global Commission, ni ikimenyetso cy’icyizere amahanga amufitiye mu bijyanye no guteza imbere ikoranabuhanga.
Inama ya mbere y’iyi komisiyo iteganyijwe kuba ku wa 8 Nyakanga 2026 i Geneva mu Busuwisi, mu gihe hazaba hateraniye inama mpuzamahanga ya AI for Good Global Summit 2026.
Mu myaka yashize, u Rwanda rwakomeje gushyira imbere gahunda zo kubaka ubukungu bushingiye ku ikoranabuhanga, guteza imbere serivisi z’ikoranabuhanga no gushora imari mu bushakashatsi kuri AI.
Ku wa 8 Kanama 2026 ni bwo uRwanda rwatangaje ko hagiye gushyirwaho ikigo cy’igihugu gishinzwe AI, kizafasha mu kwihutisha iterambere, guhanga ibishya, gushyira mu bikorwa ishoramari no kunoza imiyoborere.
Mu 2025, Kigali habereye Inama Mpuzamahanga ya Global AI Summit on Africa, yahuje abayobozi n’inzobere mu ikoranabuhanga zaturutse hirya no hino ku Isi.
