Kapiteni w’ikipe y’igihugu ya Uganda, Zaina Namuleme wamaze gusinyira ikipe ya Rayon Sports y’abagore, yageze i Kigali mu gitondo cyo kuri uyu wa Kabiri tariki 21 Nyakanga 2026 aho aje gutangira imirimo ye muri Rayon Sports.
Zaina Namuleme w’imyaka 26 yasinyiye Rayon Sports amasezerano y’imyaka ibiri nyuma y’uko arangije amasezerano mu ikipe ya Kenya Police Bullets yo muri Kenya yakiniraga.
Namuleme abaye umugande wa mbere ugiye gukinira Rayon Sports y’abagore ndetse yari ku rutonde rw’abakinnyi bari kwerekanwa kuri ‘Rayon Day 2026’ yabaye tariki 18 Nyakanga 2026 ariko kuko yari ataragera mu Rwanda ntabwo yerekanwe.
Namuleme ukina mu kibuga hagati yitezweho gufasha ikipe ya Rayon Sports mu mwaka utaha w’imikino by’umwihariko mu mikino ya CECAFA yo gushaka itike y’Igikombe kiruta ibindi muri Afurika, CAF Women’s Champions League, izabera mu Rwanda hagati ya tariki 22 Kanama na tariki 6 Nzeri 2026.
Umwaka ushize Rayon Sports yari yagarukiye ku mwamba kuko yatsindiwe na JKT Queens ku mukino wa nyuma igitego 1-0 bituma itabasha kujya muri CAF Women’s Champions League bwa mbere mu mateka yayo.
Zaina Namuleme yatangiye kumenyekana mu 2016 ubwo yakiniraga ikipe ya Kampala Queens yanaje kubera kapiteni mbere yo kwerekeza mu ikipe ya Makerere University muri 2024, nayo yavuyemo ajya muri Kenya Police Bullets aho yanatwaranye nayo igikombe cya Shampiyona ya Kenya.
Kuri uyu wa Mbere tariki 21 Nyakanga 2026 ni bwo ikipe ya Rayon Sports yatangiye imyitozo ku kibuga cya Skol mu Nzove aho isanzwe ikorera, yitegura umwaka utaha w’imikino wa 2026/27.
