Ikipe ya Rayon Sports yatsinze ikipe ya Al Hilal SC Omdurman yo muri Sudani igitego 1-0 imbere ya Minisitiri w’Intebe w’u Rwanda, Nsengiyumva Justin, bituma izamuka muri 1/2 ari iya mbere mu itsinda C.
Kuri uyu wa Gatandatu tariki 1 Kanama 2026, hakinwe imikino ibiri yo mu itsinda C muri CECAFA Kagame Cup ari nayo yashyize akadomo ku mikino y’amatsinda ndetse isiga hamenyekanye amakipe 4 yerekeje muri 1/2.
Umukino warufite igisobanura ku irushanwa ni uwahuje Rayon Sports na Al Hilal SC muri Sitade Amahoro, wagombaga kugena ikipe izamuka muri iri tsinda ari iya mbere.
Umutoza Haringingo Francis Christian wa Rayon Sports ntiyigeze akora impinduka mu bakinnyi 11, abari babanjemo ku mukino wa Tusker FC n’ubundi nibo bongeye kubanzamo kuri uyu mukino.
Abakinnyi 11 bari barangajwe imbere n’umuzamu Dande Junior, ba myugariro Ganijuru Ishimwe Elie, Charles Tchouplaou, Nshuti Didier na kapiteni Nshimiyimana Emmanuel “Kabange”, mu kibuga hagati yari Muderi Akbar, Ibrahim Mansouru Djingarey na Issa Djiguiba naho abatakaga izamu bari Iradukunda Elie Tatou, Kameni Herman Junior na Antonio Kossivi Atisso Kodjo.
Umukino watangiye ikipe ya Rayon Sports yatakana imbaraga n’ubwo Al Hilal SC nayo yayirushaga kwiharira umupira.
Rayon Sports yaje kubona umupira watewe neza na Nshimiyimana Emmanuel, usanga Atisso ahagaze neza ahita anyeganyeza inshundura zari zirinzwe n’umuzamu Soufiane Farid Ouedraogo.
Iki ni igitego cya 3 Atisso yaratsindiye Rayon Sports nyuma y’icyo yatsinze kuri Rayon Day atsinda Gor Mahia FC ndetse n’igitego yatsinze Tusker FC muri iri rushanwa rya CECAFA Kagame Cup 2026.
Nyuma yo kubona igitego, Rayon Sports yasubiye inyuma bituma Al Hilal iyataka cyane n’ubwo igice cya mbere cyarangiye itabashije kunyeganyenza inshundura.
Mu kiruhuko cy’igice cya mbere, umuhanzi Diez Dola yasusurukije abari bitabiriye uyu mukino.
Mu gice cya kabiri, umutoza Haringingo yinjiranye gahunda yo kurinda ibyagezweho cyane ko no kunganya bitari kugira icyo biyihungabanyaho kuko yari kujya muri 1/2, ikazamuka nk’ikipe yatsinzwe neza (Best looser).
Umutoza wa Al Hilal Guy Bukasa Misakabu we yinjiye mu gice cya kabiri akora impinduka yinjizamo abakinnyi bakina basatira izamu ashaka igitego.
Muri iki gice cya kabiri ikipe ya Rayon Sports yihagazeho cyane, yugarira neza umukino urangira ibonye intsinzi y’igitego 1-0 bituma izamuka muri 1/2 iyoboye itsinda.
Rayon Sports niyo kipe yonyine yazamutse ifite amanota 9/9 muri iyi mikino ya CECAFA Kagame Cup, ndetse izamuka yizigamye ibitego 4 kandi itinjizwe igitego na kimwe.
N’ubwo Al Hilal SC yatsinzwe uyu mukino ariko n’ubundi nayo yakomeje muri 1/2 nk’ikipe yatsinzwe neza n’amanota 6, yizigamye ibitego 6.
Undi mukino wabaye wo muri iri tsinda warangiye ikipe ya Tusker FC yo muri Kenya itsinze KVZ SC yo muri Zanzibar ibitego 2-0, bituma Tusker irangiza imikino yo muri iri tsinda ari iya gatatu n’amanota 3, naho KVZ isezererwa ntanota na rimwe ifite, ifite umwenda w’ibitego 8 ndetse nta gitego na kimwe yinjije.
Muri 1/2, Rayon Sports izahura na Jamus SC yo muri Sudani y’Epfo yazamutse ari iya mbere mu itsinda B, naho Al Hilal izahure na Gor Mahia FC yo muri Kenya.
Imikino ya 1/2 izakinwa ku wa Kabiri tariki 4 Kanama 2026 muri Kigali Pele Stadium.
