Ikipe ya RSSB Tigers yo muri Rwanda yageze muri 1/2 cy’irangiza cy’igikombe gihuza amakipe yabaye aya mbere ku migabane yayo, FIBA Intercontinental Cup, kiri kubera i Beijing mu Bushinwa, nyuma yo gusoreza ku mwanya wa kabiri mu mikino y’amatsinda.
RSSB Tigers ihagarariye Afurika yabonye umwanya wa kabiri nyuma y’umukino wo kuri uyu wa Kane tariki 24 Nzeri 2026, ikipe ya Rytas Vilnius yo muri Lithuania yatsinzemo Shanghai Sharks yo mu Bushinwa amanota 107-66.
Uyu mukino watumye Rytas Vilnius ihagararaye u Burayi ihita igira amanota 4 mu itsinda A, mu gihe RSSB Tigers yitsindiye Shanghai Sharks yahise ijya ku mwanya wa kabiri n’amanota 3 naho Shanghai Sharks ihagarariye Aziya irangiza ari iya nyuma n’amanota 2.
Ibi bivuze ko Rytas Vilnius na RSSB Tigers zahise zikomeza muri 1/2, naho Shanghai Sharks ihita isezererwa, ikaba igomba kuzakina na Beijing Royal Fighters nayo yo mu Bushinwa zihatanira umwanya wa 5-6.
Muri 1/2, ikipe ya mbere mu itsinda A izahura n’iya kabiri mu itsinda B, naho iya kabiri mu itsinda A ihura n’iya mbere mu itsinda B.
Kugeza ubu mu itsinda B ntabwo birasobanuka ikipe iba iya mbere, gusa ni hagati ya Boca Juniors yo muri Argentine ihagarariye Amerika y’Amajyepfo na NBA G League United yo muri Leta Zunze Ubumwe z’Amerika ihagarariye Amerika y’Amajyaruguru.
Umukino wa Boca Junior na NBA G League United urakinwa kuri uyu wa Kane saa 13:30 ku isaha y’i Kigali, ikipe itsinda niyo izahura na RSSB Tigers muri 1/2.
Imikino ya 1/2 ikaba izakinwa ku wa Gatandatu tariki 26 Nzeri 2026, hanyuma irushanwa rikazasozwa bukeye bwaho.
