Tariki 29 Kamena 1994 ni umunsi wa 84 mu minsi 100 Jenoside yakorewe Abatutsi yamaze, ukaba uwa 180 mu minsi igize umwaka.
Kuri uyu munsi, Abatutsi bari bihishe bataricwa bari bakomeje guhigishwa uruhindu ari nako Inkotanyi zikomeza kubohoza uduce dutandukanye zinatabara Abatutsi mu bice byo hirya no hino mu gihugu.
Kuri iyi tariki, François Léotard wari Minisitiri w’ingabo w’u Bufaransa yasuye ingabo z’icyo gihugu zari zaraje muri Operation Turquoise hafi ya Bisesero (Kibuye).
Iyi yari operasiyo yari iyobowe n’abasirikare b’Abafaransa. Tariki ya 29 Kamena yari mu minsi ya mbere y’uko abasirikare bagera ku 2,500 bakwirakwira mu cyiswe “Zone Humanitaire Sûre” mu majyepfo n’uburengerazuba bw’u Rwanda.
Ku wa 22 Kamena 1994, ni bwo Umuryango w’Abibumbye wafashe umwanzuro wemerera u Bufaransa kohereza ingabo mu Rwanda mu butumwa bwiswe “Operation Turquoise”. Icyagaragajwe nk’impamvu yabwo kwari ugutabara abahigwaga.
Nyamara ingabo zimaze kuhagera si byo zakoze ahubwo zarwanyije FPR Inkotanyi yashakaga guhagarika Jenoside, ndetse zikingira ikibaba bamwe mu bari abayobozi muri guverinoma yayiteguye batorokera muri Zaïre.
Ni ibyagaragajwe na Raporo zitandukanye ndetse bihamywa na bamwe mu basirikari bari bayirimo.
Mbere tariki ya 28 Kamena 1994, Umuryango w’Abibumbye wasohoye raporo yakozwe na René Degni-Ségui, yemeza ku mugaragaro ko mu Rwanda hari gukorerwa Jenoside. Iyo raporo yanagaragazaga ko ubwicanyi n’itoteza byari bikomeje byibasiraga cyane cyane Abatutsi.
