Abashoramari bo muri Oman barimo ibigo 15 byo mu nzego zitandukanye biteganyijwe ko bazahurira n’abo mu Rwanda mu nama igamije gushaka amahirwe mashya y’ubucuruzi, kwagura amasoko no kongera ishoramari hagati y’ibihugu byombi.
Iyi nama yiswe Oman-Rwanda Business Forum izabera i Kigali ku wa Kabiri, tariki ya 10 Ugushyingo 2026, itegurwa na Minisiteri y’Ubucuruzi, Inganda no Guteza Imbere Ishoramari ya Oman.
Nk’uko Ibiro Ntaramakuru bya Oman (ONA) byabitangaje, itsinda ry’abazitabira riyobowe na Ghalib Said Al Maamari, Umunyamabanga wa Leta muri Minisiteri y’Ubucuruzi, Inganda no Guteza Imbere Ishoramari, ushinzwe Ubucuruzi n’Inganda.
Ibigo 15 bizitabira iyi nama bikora mu nzego zirimo gutunganya ibiribwa, ubuhinzi, ingufu, ikoranabuhanga, ibikoresho bya pulasitiki n’iby’amashanyarazi.
Biteganyijwe ko hazabaho ibiganiro hagati y’abashoramari bo mu bihugu byombi, hagamijwe kurebera hamwe amahirwe yo gucuruzanya, gukwirakwiza ibicuruzwa no gushyiraho ubufatanye burambye.
Abashoramari bo muri Oman bazanamenyeshwa imiterere y’isoko ry’u Rwanda, amategeko agenga ubucuruzi n’uburyo bwo kugeza ibicuruzwa ku masoko. U Rwanda kandi rugaragazwa nk’irembo ryabafasha kugera ku masoko y’ibindi bihugu byo muri Afurika y’Iburasirazuba, birimo Kenya na Tanzania.
Ghalib Said Al Maamari yavuze ko iyi nama iri mu ngamba za Oman zo kwagura ubufatanye mu bukungu n’ibihugu bya Afurika no gushakira ibigo byayo amasoko mashya, ashimangira ko u Rwanda rufite amahirwe ashobora kubyazwa umusaruro mu nzego zitandukanye.
Iyi nama ibaye nyuma y’amezi abiri Perezida Paul Kagame agiriye uruzinduko rw’akazi muri Oman, ku wa 7-8 Nzeri 2026, aho yagiranye ibiganiro na Sultan Haitham bin Tarik.
Muri urwo ruzinduko, ibihugu byombi byasinyanye amasezerano atandukanye agamije kongera ubufatanye mu bucuruzi, ishoramari, ubuhinzi n’ubwikorezi, byemeranya no gufungura ambasade mu bihugu byombi no gushyiraho uburyo buhoraho bwo guhuza abashoramari.
