U Rwanda rwongeye gushimangira ko ruzakomeza kuba umufatanyabikorwa ukomeye mu guteza imbere uburinganire n’ubwuzuzanye bw’abagore n’abagabo, ndetse no kongerera ubushobozi abagore n’abakobwa.
Ibi byagarutsweho mu nama ngarukamwaka ihuza abayobozi ba Loni yabaye ku wa 26 Kamena 2026.
Ambasaderi w’u Rwanda wungirije muri Loni, Robert Kayinamura, yagejeje ku bitabiriye iyo nama imyanzuro n’ibitekerezo by’u Rwanda ku ngingo eshatu z’ingenzi zirimo; raporo y’Umuyobozi Mukuru wa UN Women ku ishyirwa mu bikorwa rya gahunda ya 2022–2025, ibijyanye n’ubugenzuzi n’iperereza, ndetse n’ivugururwa rya gahunda n’imikorere bya Loni
Ku bijyanye n’ishyirwa mu bikorwa rya gahunda ya UN Women, u Rwanda rwashimye intambwe yatewe mu guteza imbere uburinganire, rugaragaza ko ari ngombwa ko ihame ry’uburinganire rikomeza kuba ku isonga mu ivugururwa rya gahunda z’Umuryango w’Abibumbye.
U Rwanda rwavuze ko mu gihe Loni ikomeje ibiganiro ku ivugururwa rizwi nka UN80, ari ingenzi ko ibyagezweho mu kwimakaza ihame ry’uburinganire mu bikorwa bya gahunda zose z’uyu muryango bidateshwa agaciro, ahubwo bikarushaho gushimangirwa.
Rwanasabye ko hakomeza kubaho uburyo bunoze bwo gukurikirana no kubazwa inshingano kugira ngo iyo ntego ya 2023 izagerweho.
Ku bijyanye n’ubugenzuzi n’iperereza, u Rwanda rwashimye uburyo UN Women ikomeje kunoza imikorere y’inzego zishinzwe iperereza n’ubugenzuzi bw’imari n’imishinga, ruvuga ko kongera ubushobozi bwazo ari ingenzi mu kubaka icyizere no kunoza imiyoborere.
Rwanagaragaje ko hakenewe gukomeza guteza imbere uburyo bwo kubika amakuru, kugira ngo iperereza n’ubugenzuzi bikorwe hashingiwe ku makuru yizewe kandi arinzwe neza.
U Rwanda rwasabye Loni gukomeza kurinda ubwigenge, imikorere myiza by’igihe kirekire cy’inzego z’ubugenzuzi n’iperereza, kuko ari inkingi zifasha kubaka imiyoborere ishingiye ku mucyo, kubazwa inshingano no gukoresha neza umutungo.
Ibi byagarutsweho mu gihe u Rwanda rukomeje kuba kimwe mu bihugu byageze ku rwego rwo hejuru mu guteza imbere uburinganire, aho abagore bafite uruhare rugaragara mu nzego zifata ibyemezo no mu miyoborere y’igihugu.
