Intumwa y’Umunyamabanga Mukuru w’Umuryango w’Abibumbye muri Repubulika Iharanira Demukarasi ya Congo, akaba n’umuyobozi wa MONUSCO, James Swan, yatangaje ko ubutumwa bw’Umuryango w’Abibumbye buzakomeza gushyigikira ibikorwa bigamije kugarura amahoro mu Burasirazuba bwa RDC.
Ibi yabitangaje nyuma y’uruzinduko yagiriye i Goma mu ntara ya Kivu y’Amajyaruguru.
Nk’uko byatangajwe n’ibiro bye kuwa Gatanu tariki ya 12 Kamena, uru ruzinduko rwari rugamije gukomeza ibikorwa bijyanye n’inshingano za MONUSCO zashyizweho n’umwanzuro wa 2808 w’akanama ka ONU gashinzwe umutekano.
Mu gihe yari i Goma, James Swan yagiranye ibiganiro bitandukanye n’abahagarariye Ihuriro AFC hamwe n’umutwe wa M23, ndetse n’abayobozi b’itsinda rishinzwe iyubahirizwa ry’amasezerano y’agahenge (Mécanisme conjoint élargi de vérification).
Nyuma y’ibiganiro yagiranye n’impande zitandukanye, James Swan, yashimangiye ko hakenewe ubufatanye bukomeye hagati y’ibikorwa bitandukanye mu rwego rwa dipolomasi bigamije kugarura amahoro mu Burasirazuba bwa Congo.
Yagarutse ku biganiro biri gukorwa binyuze mu nzira zitandukanye zirimo ibiganiro bya Washington, Doha ndetse n’ibikorwa by’ubuhuza bw’umuryango w’Afurika Yunze Ubumwe.
Umuyobozi wa MONUSCO yavuze ko ubutumwa ayoboye bwiteguye gukomeza gufasha mu ishyirwa mu bikorwa ry’izo gahunda, cyane cyane mu kurinda abasivili no gufasha mu guhosha amakimbirane mu bice bikomeje kwibasirwa n’intambara.
Mu ruzinduko rwe kandi, James Swan yagiranye ibiganiro n’abakozi ba MONUSCO ndetse n’abandi bakozi b’amashami y’Umuryango w’Abibumbye bakorera i Goma.
Ibyo biganiro byafashije gusuzuma uko umutekano, politiki n’ubutabazi bihagaze mu bice bakoreramo ndetse hanaganirwa ku bikorwa by’ibanze bikenewe gukorwa no ku kibazo cyo guhangana n’icyorezo cya Ebola
