Amakipe ane ahagarariye u Rwanda muri Shampiyona Nyafurika yʼAmakipe yʼAbagabo muri Volleyball (CAVB Men’s Club Championship 2026) yageze muri ⅛ mu gihe hamaze gukinwa imikino ine muri itanu y’amatsinda.
APR VC, Police VC, Kepler VC, na REG VC zose zabonye itike nyuma y’imikino y’umunsi wa kane yabereye muri BK Arena kuri iki Cyumweru, tariki ya 26 Mata 2026, kuko uretse Kepler VC andi yose yabonye intsinzi.
Kepler VC yari yahuye n’ikipe ya Al Ahly yegukanye iri rishanwa inshuro nyinshi (16), igorwa cyane n’uyu mukino kuko iyi kipe yo mu Misiri yayitsinze amaseti 3-0 (15-25, 19-25, 20-25), inayobora itsinda B n’amanota 12 mu mikino ine, mu gihe Kepler Vc iyikurikiye n’amanota 9 ndetse zose zamaze kubona itike ya ⅛.
Andi makipe yo yabonye intsinzi, ndetse Police na APR zo ntiziratsindwa na rimwe. Police yujuje intsinzi ya Kane nyuma yo gutsinda Ghana Army amaseti 3-0 (25-20, 25-20, 25-23).
Ni mu gihe APR VC bigoranye cyane mu mukino w’imbaturamugabo, yatsinze Nigeria Customs amaseti 3-2 (21-25, 25-21, 25-21, 24-26, 9-15). Iyi kipe y’Ingabo z’Igihugu yatsinze yifashishije kamarampaka nyuma yo kunganya amaseti 2-2 n’iyi kipe yo muri Nigeria.
REG VC yari yatangiye itsindwa umukino wa mbere, ubu ntirongera gutakaza ndetse kuri uyu munsi yifatiye ku gakanu Atlético Clube Do Mindelo yo muri Cape Cevde, iyitsinda amaseti 3-0 (25-14, 25-19, 25-13).
Kugeza ubu amakipe ane arimo APR VC na Police VC zo mu Rwanda, Al Ahly SC yo mu Misiri na Port Autonome De Douala yo muri Cameroun ni yo ayoboye amatsinda yayo uko akurikirana, aho afite amanota 12 mu mikino ine amaze gukina uretse APR ifite 11 kuko yatsindiye umukino kuri kamarampaka.
Amakipe arasubira mu kibuga kuri uyu wa Mbere, tariki ya 27 Mata 2026, akina umukino wa gatanu, usoza iy’amatsinda, aho imikino y’ahagarariye u Rwanda , ibimburirwa na Police VC ikina na Kenya Ports Authority VC saa munani muri BK Arena.
Ni mu gihe saa kumi n’ebyiri (18:00) Kepler VC ikina n’Ikipe ya Equity Bank yo muri Kenya, ugakurikirwa n’uwa APR VC na Petrojet yo mu Misiri saa mbiri muri BK Arena. REG VC yo irakinira muri Petit Stade saa mbiri, aho ihurira na Kalibi Sports Culb yo muri Ghana.
