Amakipe ya APR WVC na Kenya Ports Authority WVC (KPC) mu bagore na APR VC na Kepler VC mu bagabo, yageze ku mukino wa nyuma w’irushanwa rya Volleyball ryo kwibuka abazize Jenoside yakorewe Abatutsi mu 1994, Genocide Memorial Volleyball Tournament 2026 (GMT).
Kuri uyu wa Gatandatu, tariki 20 Kamena 2026, wari umunsi wa kabiri w’irushanwa rya GMT ryatangiye ku wa gatanu hakinwa imikino y’amatsinda.
Ku wa gatandatu hakinwe imikino ya 1/4 na 1/2 mu bagabo naho mu bagore bakina imikino ya 1/2 yasize hamenyekanye amakipe yerekeza ku mukino wa nyuma muri buri cyiciro.
Mu bagabo, ikipe ya APR VC yageze ku mukino wa nyuma isezereye REG VC iyitsinze amaseti 3-2 (31-29,24-26,23-25,25-22,15-13) nyuma y’uko yari yanasezereye Sky VC yo muri Uganda muri 1/4 iyitsinze amaseti 3-0 (25-13, 25-18, 25-13).
Ni mu gihe Kepler VC y’umutoza Jean Patrice Ndaki Mboulet yageze ku mukino wa nyuma nyuma yo gusezerera Police VC iyitsinze amaseti 3-0 (25-23, 25-16, 25-16), nyuma y’uko yari yasezereye Finance VC yo muri Benin muri 1/4 iyitsinze amaseti 3-0 (25-22, 25-23, 25-22).
Mu bagore, APR WVC yageze ku mukino wa nyuma itsinze Police WVC amaseti 3-2 (16-25, 20-25, 25-20, 29-27, 15-9) naho KPC WVC yo muri Kenya nayo yageze ku mukino wa nyuma itsinze Kepler WVC amaseti 3-2 (25-17, 21-25, 23-25, 25-21, 15-9).
Kuri iki Cyumweru tariki 21 Kamena 2026, irushanwa rya GMT rirashyirwaho akadomo hakinwa imikino yo guhatanira umwanya wa gatatu ndetse n’imikino ya nyuma.
Imikino iratangira saa tanu za mu gitondo (11:00), aho REG VC ikina na Police VC muri Petit Stade zihatanira umwanya wa gatatu mu bagabo naho mu bagore umukino wo guhatanira umwanya wa gatatu uratangira saa 12:00 uhuze Police WVC na Kepler WVC muri Gymnase ya NPC.
Saa 14:00 nibwo umukino wa nyuma mu bagore hagati ya APR WV na KPC WVC uteganyijwe gutangira naho umukino wa nyuma mu bagabo uteganyijwe gutangira saa 16:30 uhuza APR VC na Kepler VC. Iyi mikino yombi izabera muri Petit Stade i Remera.
