Ikipe ya Gisagara VC yatangaje ko yamaze gusinyisha umukinnyi w’umunya-Tanzania Omary Bure Hassan wavuye muri EAUR VC na Masezerano Jean Claude wari urangije amasezerano muri Kigali VC (KVC).
Mu gitondo cyo kuri uyu wa Gatatu, tariki 30 Nzeri 2026 nibwo Gisagara VC yatangaje ko yasinyishije aba bakinnyi bombi.
Bure ukina yataka (Outside hitter) yasinye amasezerano y’imyaka 3 naho Masezerano Jean Claude ukina asaranganya imipira (Setter) asinya ay’umwaka umwe.
Bure yagiye muri Gisagara VC asimbura umugande Allan Ejiet Olokotum wamaze gutandukana n’iyi kipe yo mu Ntara y’Amajyepfo, naho Masezerano yasimbuye Ngaboyintwari Cedrick nawe wamaze kuyivamo kuri ubu akaba atarabona indi.
Bure yigaragaje cyane muri EAUR VC ari nacyo cyatumye Gisagara VC imusinyisha nyuma y’uko yanayikiniye muri GMT y’uyu mwaka.
Masezerano ni mushya muri Gisagara VC ndetse asanzwe ari n’umuvandimwe w’umutoza mukuru w’iyi kipe Kwizera Pierre Marchal.
Aba bakinnyi binjiye muri iyi kipe nyuma y’uko yanasinyishije amasezerano y’imyaka 2 umunya-Sudani y’Epfo James Achuil ukina inyuma (Opposite hitter) avuye muri EAUR VC na Rukundo Bienvenue ukina hagati (Middle blocker) avuye muri REG VC n’ubwo itarabatangaza.
Gisagara VC ikomeje kwiyubaka ishaka kongera kugaruka ku gasongero kuko iheruka igikombe cya Shampiyona muri 2023, nyuma y’aho yamaze imyaka ibiri itabona itike y’imikino ya kamarampaka.
Umwaka w’imikino wa 2025/26 nibwo yongeye kujya mu mikino ya kamarampaka nyuma yo kurangiza imikino isanzwe ya Shampiyona ari iya mbere, ariko mu ya kamarampaka ntabwo byayikundiye kuko yasezerewe muri 1/2, ndetse birangira inatsindiwe ku mukino wo guhatanira umwanya wa gatatu.
