Kuri uyu wa Gatandatu tariki 22 Kanama 2026, Minisitiri wa Siporo, Nelly Mukazayire, yahuye n’ikipe y’Igihugu y’u Rwanda y’abagore muri volleyball mbere y’uko ihaguruka mu Rwanda yerekeza i Nairobi muri Kenya ahazabera Igikombe cy’Afurika, CAVB Women’s Nations Championship.
Minisitiri Mukazayire yahaye idarapo iyi kipe ayibutsa ko igiye guhagararira igihugu ndetse ayisaba kuzitwara neza.
Uyu muhango wanitabiriwe na Perezida w’Ishyirahamwe ry’Umukino wa Volleyball mu Rwanda (FRVB), Ngarambe Raphaël n’Umunyabanga mukuru w’iri Shyirahamwe, Dushime Jacques.
Kuri uyu wa Gatandatu nibwo n’umutoza w’umufaransa Frédéric Guérin utoza ikipe y’Igihugu y’u Rwanda yatangaje urutonde rw’abakinnyi 14 bazaba bagize ikipe y’u Rwanda barangajwe imbere na Kapiteni Munezero Valentin.
Aba bakinnyi ni Mpuhwezimana Diane na Ndagijimana Iris basaranganya imipira (Setters), Musaniwabo Hope, Musabyemariya Donatha, Umutoni Anitha na Dusabe Flavia bakina hagati (Middle blockers), Uwimbabazi Lea na Uzamukunda Fillete bakina nka libero.
Abandi bakinnyi ni Munezero Valentin, Tuyishime Aloysie, Mukandayisenga Benitha na Nzamukosha Olive bakina bataka (Outside hitters) ndetse na Yankurije Francoise na Nyirahabimana Marie Divine bakina inyuma (Opposite hitters).
Frédéric Guérin azaba yungirijwe na Hatumimana Christian usanzwe ari umutoza mukuru wa Police WFC na Igihozo Cyuzuzo Yvette usanzwe ari umutoza wungirije wa APR WVC.
Imikino y’igikombe cy’Afurika izatangira tariki 23 Kanama isozwe tariki 5 Nzeri 2026. Izitabirwa n’amakipe 16 arimo u Rwanda na Kenya izakira iyi mikino ndetse ifite n’igikombe giheruka.
Andi makipe azitabira iki gikombe ni Misiri yatsindiwe ku mukino wa nyuma mugikombe cy’ubushize cya 2023, Cameroon, Algeria, Nigeria, Morocco, Uganda, Mali, Burkina Faso, Tunisia, Senegal, Ghana, Reubulika Iharanira Demokarasi ya Congo, u Burundi na Zambia.
Iki gikombe kizatanga itike y’Igikombe cy’Isi cya 2027 kizabera muri Leta Zunze Ubumwe z’Amerika na Canada n’imikino ya Olempike izabera Los Angeles muri Leta Zunze Ubumwe z’Amerika muri 2028.
Mu gikombe cy’Afurika giheruka muri 2023 cyabereye Yaoundé muri Cameroon, u Rwanda rwasoreje ku mwanya wa 4 mu makipe 12 yari yitabiriye.
