Ikipe y’Igihugu y’u Rwanda y’umukino wa volleyball mu bagabo yazamutseho imyanya 17 ku isi, igera ku mwanya wa 67 ku rutonde rw’Impuzamashyirahamwe y’Umukino wa Volleyball ku Isi, FIVB, rwakozwe kuri uyu wa Kane, tariki 24 Nzeri 2026, naho mu bagore rwisanga ku wa 59 ku isi.
Kuri uru rutonde, u Rwanda rwageze ku mwanya wa 5 muri Afurika inyuma ya Misiri, Tunisia, Cameroon na Nigeria.
U Rwanda rwabonye amanota menshi nyuma yo gutsinda imikino 4 kugeza ubu mu Gikombe cya Afurika kiri kubera i Tunis muri Tunisia.
Kuri uyu wa Kane nibwo u Rwanda rusoza imikino yarwo mu Gikombe cya Afurika rukina na Misiri mu guhatanira umwanya wa 5-6.
Ibi bivuze ko u Rwanda rwongera gusoreza mu makipe 6 ya mbere nk’uko byagenze mu Gikombe giheruka cyo muri 2023.
U Rwanda niyo kipe ya gatatu yazamutseho imyanya myinshi kuri uru rutonde nyuma ya Algeria yazamutseho imyanya 26 na Maroc yazamutseho 23, ni mu gihe ikipe yamanutseho imyanya myinshi ari Gambia yamanutseho 15.
Urutonde rw’isi muri rusange ruyobowe na Pologne iheruka kwegukana Volleyball Nations League, igakurikirwa n’u Butaliyani n’u Burusiya.
Misiri ya mbere muri Afurika, iri ku mwanya wa 30 ku Isi, naho ikipe ya nyuma muri Afurika ni u Burundi buri ku mwanya wa 28 muri Afurika, n’uwa 145 ku isi imbere ya Cambodia na New Zealand ya nyuma.
Mu bagore, u Rwanda rwageze ku mwanya wa 59 ku Isi nyuma yo kurangiriza ku mwanya wa 4 mu Gikombe cya Afurika giheruka kubera Nairobi muri Kenya, naho muri Afurika ruri ku wa 4 inyuma ya Kenya, Misiri na Cameroon.
Urutonde muri rw’Isi ruyobowe n’u Butaliyani, bukurikirwa na Brazil, na Türkiye iheruka kwegukana FIVB Volleyball Nations League.
Ikipe ya nyuma ku isi ni iya Uzbekistan iri ku mwanya wa 133, naho ikipe izi inyuma mu yo muri Afurika ni Senegal iri ku wa 114 ku isi, ikaba ku wa 22 muri Afurika.
