Ikigo cy’Igihugu Gishinzwe Guteza imbere Iyoherezwa mu Mahanga ry’Ibikomoka ku Buhinzi n’Ubworozi (NAEB) cyatangaje ko abahinzi b’ikawa batazongera guhabwa ifumbire ku buntu.
Iri tangazo rigenewe abahinzi ba Kawa ryashyizwe hanze na NAEB, kuri uyu wa mbere, tariki ya 25 Kanama 2025.
NAEB ivuga ko mu rwego rwo gukomeza gufasha abahinzi ba Kawa kubona inyongeramusaruro bakeneye biboroheye, guhera mu gihembwe cy’ihinga cya 2026 A, abahinzi b’Ikawa bose bazajya bagezwaho ifumbire na Tubura ku bufatanye na NAEB na CEPAR.
Iki kigo kivuga ko nta fumbire y’ubuntu izongera gutangwa, ariko abahinzi ba Kawa bazakomeza gukorana na ‘Tubura’, aho izajya ibafasha kubona ingano yose y’ifumbire ihwanye n’umurima bafite.
Bitandukanye nuko byari bisanzwe umuhinzi azajya yishyura kimwe cya kabiri cy’ifumbire, ikindi gice akishyurirwe nka ‘Nkunganire’ binyuze mu kigega cy’ifumbire.
Iyi fumbire abahinzi bazahabwa iri mu bwoko bwa NPK 22-6-12+3S, igiciro cy’ifumbire kizaba ari 1 592 Frw/kg, ariko abahinzi bazishyurirwa kimwe cya kabiri kingana na 796 Frw/kg, naho indi 50 % bayishyurirwe ku bufatanye bwa Tubura, NAEB na CEPAR.
Ibi ni ibikubiye mu masezerano y’ubufatanye hagati ya NAEB, CEPAR n’umuryango One Acre Fund–Tubura, yashyizweho umukono ku wa 9 Nyakanga 2025.
NAEB, yari isanzwe itanga ifumbire y’ubuntu ku bahinzi ba Kawa kuva mu 2012, ariko ugasanga hagatangwa ifumbire idahagije ndetse nitangirwe ku gihe.
Ibyo byatumye hafatwa icyemezo cyo guhuza igiciro (cost-sharing) kugira ngo abahinzi babone ifumbire ihagije ku gihe kandi hafi yabo.
Abahinzi ba Kawa basabwe kwihutira kwegera abakangurambaga ba Tubura babegereye kugirango batangire gutumiza ifumbire gutumiza ifumbire hakiri kare.
One Response
Bibayebyiza murwego rwogushakira abashomeri akazi iyi fumbire mwajya mutanga amasoko kubayicuza burikagari ariko babyize mumashuri.
Murakoze.