Umusaruro mbumbe w’u Rwanda (GDP) wazamutse ku kigero cya 11.8% mu gihembwe cya gatatu cya 2025, ugera kuri miliyari 5,525 Frw, uvuye kuri miliyari 4,659 Frw wariho mu gihembwe nk’iki cy’umwaka wa 2024.
Ibi byatangajwe n’Ikigo cy’Igihugu cy’Ibarurishamibare (NISR) kuri uyu wa Kabiri, tariki ya 16 Ukuboza 2025, kivuga ko iri zamuka rigaragaza ko ubukungu bw’igihugu bukomeje kwiyongera ku muvuduko uhamye mu mwaka wa 2025.
NISR igaragaza ko iri zamuka rya 11.8% rikurikiye iryo mu gihembwe cya mbere cya 2025 ryari kuri 6.5%, n’iryo mu gihembwe cya kabiri ryari kuri 7.8%, bigaragaza ko ubukungu bukomeje kwiyongera uko umwaka ugendaga ugana ku musozo.
NISR ivuga ko urwego rwa serivisi rwagize uruhare rungana na 57% by’umusaruro mbumbe w’igihugu, inganda zagize uruhare rwa 22%, ubuhinzi bugira 15%, mu gihe umusaruro ukomoka ku misoro itaziguye ari 6%.
Urwego rw’ubuhinzi rwiyongereyeho 10% mu gihembwe cya gatatu cya 2025, umusaruro w’ibihingwa by’ibiribwa wazamutseho 4%, mu gihe ibihingwa byoherezwa mu mahanga byiyongereye cyane ku kigero cya 35%.
Ubworozi bwazamutseho 6%, naho uburobyi buzamukaho 34%, bigaragaza iterambere rigenda rigerwaho mu nzego zinyuranye zigize ubuhinzi.
Urwego rw’inganda rwazamutse ku kigero cya 17%, ubucukuzi bw’amabuye y’agaciro n’ay’ubwubatsi bwiyongereyeho 14%, mu gihe ibikorwa by’ubwubatsi byazamutseho 20%.
Inganda zitunganya umusaruro (manufacturing) na zo zazamutseho 14%, ahanini bitewe n’izamuka rikomeye rya sima yiyongereye ku kigero cya 44%, ibikoresho by’ibyuma byiyongera ku kigero cya 28%, n’umusaruro w’imiti wazamutseho 25%, ni mu gihe gutunganya ibiribwa byazamutseho 12%.
Mu zindi serivisi, ikoranabuhanga n’itumanaho byazamutseho 17%, serivisi z’imari zizamukaho 10%. Gusa, amahoteli na resitora byagabanutseho 3%, naho serivisi z’ubuzima zigabanukaho 16%.
Serivisi z’ubutegetsi bwa Leta zazamutseho 7%, mu gihe iz’uburezi zazamutseho 5%.
NISR ivuga ko ibi bipimo bigaragaza ko ubukungu bw’u Rwanda bukomeje kugenda butera imbere, by’umwihariko bushingiye ku iterambere ry’inganda, serivisi n’ubuhinzi bw’ibihingwa byoherezwa mu mahanga, nubwo hakiri imbogamizi mu nzego zimwe na zimwe zirimo amahoteli n’ubuzima.
