Ikipe ya Muhazi United yagombaga gukina icyiciro cya kabiri cya Shampiyona y’u Rwanda, yahumurije abafana bayo nyuma y’uko yimwe uburenganzira bwo kuzayitabira.
Mu butumwa iyi kipe ihurirwaho n’akarere ka Rwamagana na Kayonza yanyujije ku mbuga nkoranyambaga zayo yagize iti” Ubuyobozi bwa Muhazi United FC buramenyesha abakunzi bayo ko buri gushaka igisubizo ku kibazo cyo kuba itarahawe uburenganzira (License) bwo gukina Shampiyona y’icyiciro cya ka kabiri muri 2026-27.”
Muhazi United iri mu makipe 4 yimwe uburenganzira n’Ishyirahamwe ry’Umupira w’Amaguru mu Rwanda, FERWAFA, bwo kwitabira Shampiyona y’icyiciro cya kabiri mu mwaka wa 2026-27 bitewe no kudatanga amasezerano y’ibibuga azajya yakiriraho imikino yayo.
Uretse Muhazi United, andi makipe atarahawe uburenganzira bwo kwitabira Shampiyona y’icyiciro cya kabiri ni Unity FC, Motar FC na Addax SC.
Nyuma y’uko aya makipe adahawe uburenganzira, yajuririye uwo mwanzuro ndetse atanga amasezerano y’ibibuga azakoresha nk’uko yabisabwaga ariko birangira Komite Ishinzwe guha amakipe ubuzima gatozi muri FERWAFA (Club licensing) ibwanze.
Ibi bivuze ko kugeza ubu, Shampiyona y’icyiciro cya kabiri mu Rwanda izakinwa n’amakipe 16 aho kuba 20 nk’uko byari bisanzwe.
Aya makipe 4 ntabwo agaragara ku rutonde rw’amakipe azakina icyiciro cya kabiri yahawe ubutumire na FERWAFA mu nama iteganyijwe tariki 3 Ukwakira 2026, igamije kwitegura umwaka w’imikino mushya wa Shampiyona y’Icyiciro cya Kabiri mu bagabo.
Aya makipe yose agaragaza ko yarenganyijwe, ndetse akomeje gutegereza umwanzuro wa nyuma ku bibazo byayo.
