Umugaba Mukuru w’Ingabo z’u Rwanda, Gen MK MUBARAKH, yakiriye ku cyicaro gikuru cy’Ingabo z’u Rwanda (RDF) i Kimihurura itsinda rya Ofisiye Bakuru baturutse mu Ishuri Rikuru rya Gisirikare rya Malawi bari mu rugendoshuri mu Rwanda.
Urugendoshuri rugamije kongera ubumenyi ndetse no guha abitabiriye amahirwe yo kwigira ku bunararibonye bw’u Rwanda mu guhindura no kuvugurura urwego rw’ingabo, kubaka amahoro, no guteza imbere igihugu, hibandwa by’umwihariko ku bijyanye n’uburyo ikoranabuhanga ryifashishwa mu gukomeza ubushobozi bw’igihugu bwo gukemura ibibazo bitandukanye.
Iri tsinda riyobowe na Colonel Joseph Mambo, Umuyobozi Wungirije w’Ishuri akaba n’Ukuriye abarimu.
Mu ijambo rye, Umugaba Mukuru w’Ingabo z’u Rwanda, Gen MK MUBARAKH, yashimiye aba ba Ofisiye baturutse muri Malawi kuba barahisemo u Rwanda nk’igihugu cyo gukoreramo uru rugendoshuri.
Yagize ati: “Ndashimira Ingabo za Malawi kuba zarahisemo u Rwanda nk’igihugu cyo gukoreramo uru rugendoshuri. Nizeye ko ibiganiro n’ibikorwa muzasura mu Rwanda bizabungura ubumenyi n’ubunararibonye mu mwuga w’igisirikare.”
Yashimangiye ko uru ruzinduko ari ikimenyetso cy’umubano mwiza kandi umaze igihe kirekire hagati y’u Rwanda na Malawi, harimo n’umubano ukomeye n’ubufatanye hagati y’ingabo z’ibihugu byombi.
Mu ijambo rye, Colonel Joseph Mambo yavuze ko bahisemo kuza mu Rwanda kubera ko ari igihugu gitanga ikizere, urebye aho cyavuye n’aho kigeze ubu.
Yagize ati:“Niba ushaka kwiga ku bijyanye n’ubudaheranwa, umutekano n’iterambere, u Rwanda ni urugero rwiza, kuko u Rwanda ni urumuri rw’ibihugu byose bya Afurika.”
Nyuma yo gusura icyicaro gikuru cy’Ingabo z’u Rwanda, itsinda rya Ofisiye baturutse muri Malawi ryasuye ibigo bya Minisiteri y’Ingabo bishinzwe imibereho myiza y’abasirikare, birimo Zigama CSS, MMI n’ Ihahiro ry’Inzego z’Umutekano, kugira ngo barusheho gusobanukirwa serivisi z’imibereho myiza zihabwa abasirikare b’u Rwanda n’imiryango yabo.
Muri gahunda y’uru rugendo, aba ba Ofisiye kandi basuye Urwibutso rwa Jenoside rwa Kigali ruherereye i Gisozi ndetse n’ Ingoro y’ Amateka y’urugamba rwo kubohora igihugu, aho bamenye byinshi ku mateka ya Jenoside yakorewe Abatutsi, n’uburyo yahagaritswe n’ingabo za RPA.
Uru rugendoshuri ni umwanya mwiza kuri ba Ofisiye baturutse mu Ishuri Rikuru rya Gisirikare rya Malawi kungurana ubumenyi n’ubunararibonye na bagenzi babo bo mu Ngabo z’u Rwanda, ndetse no kurushaho gusobanukirwa impinduka u Rwanda rwakoze mu rwego rw’ingabo n’umutekano.
Uru ruzinduko kandi rugira uruhare mu kurushaho gukomeza umubano n’ubufatanye hagati y’ingabo z’u Rwanda n’iza Malawi.
