U Rwanda rwiyemeje kurushaho gukoresha ikoranabuhanga rishingiye ku makuru y’ahantu (Geospatial) mu kunoza igenamigambi ry’amashanyarazi, hagamijwe kumenya ahakenewe ingufu, guhitamo uburyo buhendutse bwo kuyageza ku baturage no kwihutisha intego yo kugeza amashanyarazi kuri bose.
Ibi byagarutsweho mu mahugurwa y’iminsi ibiri ku igenamigambi rihuriweho ry’amashanyarazi, yateguwe ku bufatanye bwa COMESA, Banki y’Isi, Climate Compatible Growth (CCG) na ESMAP, yatangiye kuri uyu wa Mbere, tariki ya 2 Ugushyingo 2026, i Kigali.
Aya mahugurwa yahuje abahagarariye ibihugu 19 byo muri Afurika y’Iburasirazuba n’Amajyepfo, hagamijwe kubongerera ubushobozi mu gukoresha ikoranabuhanga rya Geospatial mu igenamigambi ry’ingufu.
U Rwanda ruri mu bihugu bikomeje kongera umubare w’ingo zifite amashanyarazi. Imibare ya Rwanda Energy Group (REG) igaragaza ko kugeza mu mpera za 2025, ingo 85,4% zari zifite amashanyarazi, harimo 60,1% zicaniwe n’umuyoboro mugari w’igihugu na 25,3% zikoresha amashanyarazi aturuka ku mirasire y’izuba n’ubundi buryo butari kuri uwo muyoboro.
Ibi bivuze ko ingo 14,6% zari zitaragerwaho n’amashanyarazi, bigaragaza ko hakiri urugendo rwo kugera ku ntego yo gucanira ingo zose.
Umuyobozi muri Rwanda Energy Group (REG) ushinzwe ibijyanye n’iterambere ry’ingufu muri Energy Development Corporation Limited (EDCL), Jovin Sekanabanga, yavuze ko u Rwanda ruzungukira byinshi muri aya mahugurwa, cyane cyane mu kunoza igenamigambi risanzwe rikoreshwa mu kugeza amashanyarazi ku baturage.
Yagaragaje ko nubwo u Rwanda rumaze gutera intambwe mu igenamigambi ry’amashanyarazi, hakiri ibikwiye kunozwa birimo gukusanya amakuru yizewe no guhuza gahunda zitandukanye z’igenamigambi kugira ngo zirusheho gufasha abashoramari n’abashyira mu bikorwa imishinga.
Ati: “Haracyakenewe kongera ubushobozi mu gukusanya amakuru no kureba ko amakuru akoreshwa mu igenamigambi ari ukuri, yizewe kandi afite ireme. Ikindi ni uguhuza igenamigambi ritandukanye kugira ngo rihuzwe neza kandi rifashe abashoramari n’abashyira mu bikorwa imishinga.”
Jovin yavuze ko ubumenyi n’uburyo bushya bwo gukora igenamigambi bizasangirwa muri aya mahugurwa bushobora gufasha u Rwanda kwihutisha intego yo kugeza amashanyarazi kuri bose, kongera uruhare rw’ingufu zisubira no kunoza uburyo igihugu kivanga amasoko atandukanye y’ingufu.
Yasobanuye ko igenamigambi ry’amashanyarazi ridashingira gusa ku kumenya ingano y’ingufu zikenewe, ahubwo ko risaba no gusobanukirwa neza n’aho abaturage batuye, ibikoresho bihari n’uburyo buboneye bwo kubagezaho amashanyarazi.
Ikoranabuhanga rya Geospatial rizafasha mu gusesengura amakuru agaragaza aho abaturage batuye, aho imiyoboro y’amashanyarazi igeze n’ahakenewe ibindi bikorwa remezo. Ibi bizafasha kumenya niba ahantu runaka hakwiye kugeza umuyoboro mugari, gukoresha amashanyarazi akomoka ku mirasire y’izuba cyangwa kubaka imiyoboro mito yigenga.
Umuyobozi wa COMESA ushinzwe ubukungu bw’ingufu, Dr Ahmed Abdallah, yavuze ko ibihugu byinshi byo muri Afurika bigihura n’imbogamizi zo kubona amakuru ahagije kandi yizewe, ndetse no kubura ubushobozi mu gukoresha ikoranabuhanga mu igenamigambi ry’amashanyarazi.
Yavuze ko gukoresha Geospatial bizafasha ibihugu guhitamo uburyo buhendutse bwo kugeza amashanyarazi ku baturage, cyane cyane abatuye mu bice biri kure y’imiyoboro isanzwe.
Ati: “Ubu ikibazo si ukugeza amashanyarazi ku baturage gusa no kwagura imiyoboro, ahubwo ni ugushaka uburyo bwiza kandi buhendutse bwo kubagezaho amashanyarazi.”
Yatanze urugero rw’umudugudu uri kure y’umuyoboro w’amashanyarazi, avuga ko hakwiye kubanza kwigwa niba byaba byiza kuwuhuza n’umuyoboro w’igihugu cy’abaturanyi, kuwushyiriraho amashanyarazi yihariye akomoka ku mirasire y’izuba cyangwa gukoresha uburyo buvanze, aho kwihutira kwagura ibikorwa remezo bishobora gutwara amafaranga menshi.
Ku ruhande rwa Banki y’Isi,Dana Resankova yavuze ko igenamigambi ari imwe mu nkingi za gahunda ya ASCENT, igamije kwihutisha kugeza amashanyarazi ku bantu miliyoni 100 muri Afurika y’Iburasirazuba n’Amajyepfo.
Yagaragaje ko ibihugu bidakwiye kugira igenamigambi gusa, ahubwo bigomba no kugira ubushobozi bwo kurivugurura bitewe n’impinduka mu mibereho y’abaturage, aho batuye n’iterambere ry’ikoranabuhanga.
Ati: “Icyo dushaka kugeraho si ukuba ibihugu bifite gusa gahunda z’igenamigambi, ahubwo ni ugukomeza ubushobozi bwo kuzikoresha, kuzivugurura no kuzihuza n’impinduka ziba mu gihe.”
Yavuze ko binyuze mu bufatanye bwa COMESA, CCG na ESMAP, ibihugu bizafashwa kubona ibikoresho n’ubumenyi bikenewe kugira ngo bishobore kwikorera igenamigambi, kurikurikirana no kurivugurura aho bikenewe.
Aya mahugurwa ateganyijwe gufasha ibihugu byitabiriye kumenya icyuho kiri mu igenamigambi ryabyo, gushyiraho ibyihutirwa mu kongerera ubushobozi inzego zibishinzwe no kumvikana ku bufasha bwa tekiniki bizakenera nyuma yayo.
