Kuri uyu wa kane tariki 27 Kanama 2026, umunyamakuru w’imikino kuri Radio/TV 10 Hitimana Jean Claude uzwi nka “Hit” yasezeranye imbere y’amategeko n’umukunzi we Ishimwe Muhayimpundu Adelaide uzwi nka “Ida” nawe uherutse gusezera kuri iki gitangazamakuru cya Radio/TV 10.
Umuhango wo gusezerana imbere y’amategeko hagati ya Hit na Ida wabereye mu Murenge wa Kimihurura mu Karere ka Gasabo ho mu Mujyi wa Kigali imbere y’abayobozi, umuryango n’inshuti.
Uyu muhango ubaye nyuma y’uko tariki 25 Kanama 2026, Ida yakorewe ibirori byo gusezera ubukumi akitegura urugo bizwi nka “Bridal shower” mu Cyongereza, mu gihe aba bombi banitegura gukora ubukwe tariki 5 Nzeri 2026 nk’uko bamaze kubitangaza.
Kugeza ubu Hit aracyakora kuri Radio/TV 10 mu kiganiro “10 Sports Urukiko” mu gihe Ida ataragira ahandi yerekeza nyuma yo gusezera kuri iki gitangazamakuru yakoranagaho n’umukunzi we.
Ida aheruka kugira uruhare mu bikorwa by’imikino tariki 18 Nyakanga 2026 ubwo yayoboraga umuhango wo kwerekana abakinnyi ba Rayon Sports y’abagore ku munsi wa “Rayon Day” wabereye muri Kigali Pele Stadium.
