Ikipe ya APR FC yatsinze ikipe ya Etincelles FC ibitego 2-1 mu mukino wa gicuti wabereye kuri Sitade Umuganda yo mu Karere ka Rubavu mu Ntara y’Iburengerazuba.
Uyu mukino wakinwe kuri iki Cyumweru tariki 9 Kanama 2026 mu rwego rwo gufasha amakipe yombi mu kwitegura umwaka utaha w’imikino wa 2026-2027.
Ku ruhande rwa APR FC, umutoza Taleb Abderrahim yari yabanje mu kibuga abakinnyi badasanzwe babanzamo uretse umuzamu Hakizimana Adolphe na Amani Kuodiakan Michel Breygeneve wanyuraga ku ruhande rw’ibumoso asatira izamu.
Abandi bakinnyi babanje mu kibuga bari barangajwe imbere na Ombolenga Fitina nka kapiteni wakinaga ku ruhande rw’iburyo yugarira, Bugingo Hakim, Nduwayo Alex na Ishimwe Abdoul bafatanyaga mu kugarira.
Mu kibuga hagati harimo Ngabonziza Pacifique, Iraguha Hadji na Rubuguza Jean Pierre, naho Amani yafatanyaga na Hakim Kiwanuka na Uwiyaremye Fidali mu busatirizi.
Ku ruhande rwa Etincelles FC y’umutoza Bizimana Abdu uzwi nka Bekeni, mu izamu habanjemo kapiteni Nishimwe Moise, Kayumba Daniel, Rugirayabo Hassan, Mutijima Gilbet na Kasapu Ibrahim bari mu bwugarizi, abandi babanje mu kibuga ni Kwizera Aimable, Gakumba Innocent, Mumbele Nyamwesa, Nizeyimana Jean Claude, Muhindo Fabrice na rutahizamu Amani Nyamurasa Mario.
Etincelles yari imbere y’abafana bayo yatangiye umukino ikinira inyuma cyane byatumaga APR FC ikinira umupira mu kibuga hagati cyane ndetse n’inyuma ariko ikanyuzamu ikagerageza gukina imipira yihuta inyura mu mpande.
APR FC itari yabonye ubundi buryo bufatika imbere y’izamu rya Etincelles FC yabonye igitego cya mbere ku munota wa 15 nyuma y’umupira Amani yacomekeye neza Uwiyaremye Fidali ahita asigarana n’umuzamu, ntiyakora ikosa ahita anyeganyeza inshundura.
Nyuma yo gutsindwa igitego, Etincelles FC nayo yavuye inyuma itangira kwataka izamu rya APR FC kugeza ibonye igitego cyo kwishyura cyatsinzwe na Kasapu Ibrahim wateye ishoti rikomeye aturutse ku ruhande rw’iburyo rwa APR FC maze umuzamu Hakizimana Adolphe ntiyamenya uko bigenze.
Igice cya mbere cyarangiye amakipe yombi anganya igitego 1-1 n’ubwo APR FC yari yihariye umupira.
Mu gice cya kabiri cy’umukino APR FC yinjiranye impinduka 9, uretse Amani na Kiwanuka abandi bakinnyi bose bari babanjemo bavuyemo basimburwa n’umuzamu Mudahigwa Christian, Madou Zon, Nshimiyimana Yunusu, Byiringiro Jean Gilbert, Ishimwe Christian, Dauda Yussif Seidu, Mamadou Traore, Raouf Memel Dao, na William Mel Togui.
Muri iki gice APR FC yarushije Etincelles FC mu buryo bufatika byaba mu guhererekanya umupira neza ndetse no kwataka izamu.
APR FC yaje kubona igitego cy’intsinzi ku munota wa 72 nyuma y’umupira Amani yazamuye neza ari ku ruhande rw’iburyo rwa APR FC, Togui ahita aterekaho umutwe.
Umukino warangiye APR FC itsinze ibitego 2-1, uba umukino wa 6 itsinze muri uyu mwaka w’imikino mu mikino 7 imaze gukina.
Uyu ni umukino wa gicuti wa kabiri APR FC yarikinnye nyuma yo gusezererwa mu irushanwa rya CECAFA Kagame Cup itarenze amatsinda, harimo n’umukino yatsinzwemo na Gor Mahia ibitego 5-0.
APR FC izakomeza gukina imikino ya gicuti aho yifuza gukina n’amakipe arimo Al Merreikh na Al Hilal zo muri Sudani nk’uko umutoza wayo yabitangaje nyuma y’umukino.
Ku ruhande rwa Etincelles, umutoza Bizimana yavuze ko nyuma y’uyu mukino bazakina n’undi mukino wa gicuti bazakinamo na Musanze FC n’ubundi kuri Sitade Umuganda.
