Imikino ya kamampaka yarangiye ikipe ya APR BBC na Patriots BBC ari zo zikatishije itike yo kujya ku mukino wa nyuma wa shampiyona ya Basketball y’u Rwanda, nyuma yo gutsinda RSSB Tigers na REG BBC.
Mu ijoro ryo ku wa 14 Kanama 2026 ni bwo muri Petit Stade i Remera yasojwe imikino ya ½ ya kamarampaka yo gutanguranwa instinzi eshatu mu mikino itanu ndetse yose yategereje umukino wa 5 kugira ngo hamenyekane izijya ku mukino wa nyuma.
APR BBC yageze ku mukino wa nyuma ku nshuro ya kane yikurikiranya, nyuma yo gutsinda RSSB Tigers amanota 105-78 mu mukino wabaye ku wa Gatandatu.
Ikipe y’Ingabo yatangiye umukino neza cyane, aho Craig Randall yayoboye bagenzi be mu gutsinda amanota menshi aho agace ka mbere karangiye APR BBC iri imbere n’amanota 32-17.
RSSB Tigers yaje kwisuganya mu gace ka kabiri, Tarik Bey afasha iyi kipe kugabanya ikinyuranyo, ariko n’ubundi igice cya mbere cyarangira APR BBC ikiyoboye ku manota 47-40.
Mu gace ka gatatu, APR BBC yongeye kwigarurira umukino, ibifashijwemo na Shema Osborn, maze ikinyuranyo kiriyongera ndetse agace ka gatatu karangiye APR BBC ifite amanota 80 kuri 63 ya RSSB Tigers.
Mu gace ka nyuma, APR BBC yakomeje gukina neza no gukoresha ubunararibonye bwayo, ntiyemerera RSSB Tigers kugaruka mu mukino. Uko iminota yagendaga ishira, Tigers yarushagaho gutakaza icyizere, APR BBC ikomeza kongera amanota ibifashwamo n’abafana bayo bari benshi.
Umukino warangiye APR BBC itsinze RSSB Tigers amanota 105-78, ihita yuzuza intsinzi eshatu yari ikeneye kugira ngo igere ku mukino wa nyuma.
Ku rundi ruhande, Patriots BBC na yo yabonye itike yo gukina umukino wa nyuma nyuma yo gutsinda REG BBC amanota 89-84 mu mukino utari woroshye kuko wari urimo ihangane rikomeye ku mpande zombi.
Patriots na APR BBC zizatangira guhatanira igikombe ku Cyumweru, tariki ya 16 Kanama 2026. Aya makipe azakina urukurikirane rushobora kugera ku mikino irindwi, aho ikipe izabanza gutsinda imikino ine ari yo izegukana igikombe cya shampiyona.
Ikipe itwaye igikombe ni yo ihita ibona itike yo gukina irushanwa rya BAL riheruka kwegukwana na RSSB Tigers.
