Umunyarwandakazi Uwiringiyimana Ange ukinira ikipe ya Les Hippos yahembwe nk’umukinnyi mwiza w’imikino ya kamarampaka mu Burundi, Women’s Amstel Basketball League, n’ubwo ikipe ye itabashije gutwara igikombe.
Ku wa Gatandatu tariki 8 Kanama 2026 nibwo hakinwe umukino wa 6 w’imikino ya nyuma ya kamarampaka aho Dynamo WBBC yariyoboye n’intsinzi y’imikino 3 ku mikino 2 ya Le Hippos, bivuze ko Dynamo yasabwaga gutsinda umukino umwe igahita itwara igikombe.
Uyu mukino wabereye kuri Terrain-Department i Bujumbura warangiye Dynamo itsinze Les Hippos amanota 64-63 bituma ihita yegukana igikombe cya Shampiyona y’u Burundi itsinze imikino 4-2.
N’ubwo Les Hippos itabashije gutwara igikombe ariko umunyarwanda Uwiringiyimana Ange yahembwe nk’umukinnyi mwiza w’imikino ya kamarampaka (Most Valuable Player – MVP) nyuma yo gufasha ikipe ye kugera kure ndetse ahabwa ibihumbi 500 by’amarundi nk’igihembo (500,000 BIF)
