Ikipe ya Commercial Bank of Ethiopia FC (CBE FC) yatsinze FC Ujeko yo muri Djibout ibitego 11-0 naho Simba Queens yo muri Tanzania itsinda Top Girls WFC yo mu Burundi mu mikino ibiri yo muri CECAFA y’abagore yabereye muri Kigali Pele Stadium.
Kuri uyu wa Gatandatu tariki 22 Kanama 2026 wari umunsi wa kabiri w’imikino y’irushanwa rya CECAFA ryo gushaka itike ya CAF Women’s Champions League iri kubera bwa mbere i Kigali mu Rwanda.
Kuri uyu munsi hakinwe imikino ibiri harimo umukino umwe wo mu itsinda B wahuje CBE WFC na FC Ujeko watangiye saa 13:00 n’umukino wo mu itsinda C wahuje Simba Queens na Top Girls Academy saa 16:00.
Mu mukino wa mbere wo mu itsinda B, CBE ifite igikombe cya 2024 yitwaye neza inyagira FC Ujeco ibitego 11-0 nyuma y’uko igice cya mbere cyari cyarangiye ari ibitego 11-0.
Emush Daniel yatsinze ibitego 5 muri uyu mukino ku munota wa 5, 17, 36, 60 na 73, Rediet Assresahagn yatsinze ibitego bibiri ku munota wa 30 no mu minota ya nyuma y’umukino ndetse na Lidiya Eyasu atsinda ibitego bibiri ku munota wa 66 na 76.
Ibindi bitego byatsinzwe na Tarikuwa Debiso ku munota wa 23 na Etsegenet Girman ku munota wa 45.
CBE yahise iyobora itsinda n’amanota 3, Kawempe Muslim Ladies ni iya kabiri ariko ntabwo irakina umukino n’umwe naho FC Ujeco ni iya nyuma muri iri tsinda n’umwenda w’ibitego 11.
Nyuma y’uyu mukino harukiyeho umukino wo mu itsinda C aho Simba Queens ifite igikombe cya 2022 yitwaye neza itsinda Top Girls Academy ibitego 2-0.
Ibitego bya Simba Queens byatsinzwe na Aisha Mnunka ku munota wa 63 na Kusamfula Musakanda ku munota wa 80.
Simba Queens yahise iyobora itsinda n’amanota 3, ikurikirwa na Kenya Police Bullets itarakina umukino n’umwe, Top Girls Academy ikaba iya nyuma muri iri tsinda numwenda w’ibitego 2.
Kuri iki Cyumweru tariki 23 Kanama imikino irakomeza muri Kigali Pele Stadium hakinwa imikino ibiri yo mu itsinda A ririmo Rayon Sports yo mu Rwanda.
Saa 13:00, Mafunzo yo muri Zanzibar yanganyije umukino wa mbere wo mu itsinda na Rayon Sports izakina na Yei Joint Stars yo muri Sudani y’Epfo yatsinze Denden FC ibitego 3-0 mu mukino wa mbere wo mu itsinda.
Saa 16:00, Rayon Sports nibwo izakina na Denden FC yo muri Eritrea zombi zishaka intsinzi ya mbere muri iyi mikino.
