Minisitiri w’Ibidukikije mu Rwanda, Dr. Arakwiye Bernadette, yatorewe kuyobora Inama ya 38 y’Ihuriro ry’Ibihugu byashyize umukono ku Masezerano ya Montréal agamije kurengera akayunguruzo k’imirasire y’izuba.
Minisitiri Arakwiye, ayoboye ibiganiro bigamije gusuzuma ibyagezweho no gushyiraho ingamba zo kurushaho kubahiriza ayo masezerano.
Yatorewe uyu mwanya mu nama ya MOP38 iri kubera i Kigali kuva ku wa 2 kugeza ku wa 6 Ugushyingo 2026, ihuje ibihugu byashyize umukono ku Masezerano ya Montréal n’ivugururwa ryayo ryemejwe i Kigali mu 2016.
Mu nshingano nshya, Minisitiri Arakwiye ayoboye ibiganiro byibanda ku gusuzuma intambwe ibihugu bimaze gutera mu gushyira mu bikorwa amasezerano agamije kurengera akayunguruzo k’imirasire y’izuba, hagamijwe kureba ibyagezweho n’ibikwiye kongerwamo imbaraga.
Ni ibiganiro kandi byibanda ku gushimangira ubufatanye mpuzamahanga no guteza imbere ingamba zihuriweho zo kurengera akayunguruzo k’imirasire y’izuba, mu gihe Isi ikomeje guhangana n’ingaruka z’imihindagurikire y’ikirere.
Amasezerano ya Montréal yashyizweho mu 1987 agamije kugabanya no gukuraho ikoreshwa ry’imyuka n’ibindi binyabutabire byangiza akayunguruzo k’imirasire y’izuba, karinda ibinyabuzima n’abantu imirasire mibi y’izuba.
Mu 2016, i Kigali habereye ivugururwa ry’aya masezerano rizwi nka Kigali Amendment, ryibanda ku kugabanya ikoreshwa ry’imyuka ya Hydrofluorocarbons (HFCs), ikoreshwa cyane mu bikoresho bikonjesha ariko ikagira uruhare mu kwihutisha ubushyuhe bw’Isi.
Inama ya MOP38 ibaye mu gihe hashize imyaka 10 u Rwanda rwakiriye ibiganiro byagejeje ku kwemeza iri vugururwa, bikaba ari n’umwanya wo kongera gusuzuma uruhare rw’ibihugu mu gushyira mu bikorwa ibyo byiyemeje no kwihutisha ingamba zo kurengera ikirere.
