Minisitiri w’Ingabo wa Mozambique, Major General Cristóvão Artur Chume, ari kumwe n’abandi bayobozi bakuru b’ingabo na polisi ya Mozambique, basuye Urwibutso rwa Jenoside yakorewe Abatutsi rwa Kigali ruherereye ku Gisozi.
Aba basirikare n’abapolisi ba Mozambique bari mu Rwanda, mu ruzinduko rugamije gushimangira umubano n’ubufatanye mu bya gisirikare hagati y’ibihugu byombi.
Iri tsinda ryabakora mu nzego z’umutekano za Mozambique ririmo Umugaba w’Ingabo za Mozambique zirwanira ku butaka, Maj Gen André Rafael Mahunguane, hamwe n’Umuyobozi ushinzwe serivisi y’umutekano n’umurongo mu gipolisi cya Mozambique, CP Fabião Pedro Nhancololo.
Muri uru ruzinduko rwaba bayobozi bari kumwe n’Umuvugizi w’Ingabo z’u Rwanda, Brig Gen Ronald Rwivanga, kuri uyu wa gatandatu, basuye urwibutso rwa Kigali ruherereye ku Gisozi, bunamira inzirakarengane za Jenoside yakorewe Abatutsi mu 1994.
Abo bayobozi bashyize indabo ahashyinguye inzirakarengane zazize Jenoside, banasobanurirwa amateka y’ibihe bikomeye byaranze Jenoside yakorewe Abatutsi.
Uretse aha kandi banasuye Ingoro y’Urugamba rwo Guhagarika Jenoside (Campaign Against Genocide Museum), basobanurirwa amateka n’ubutwari bwaranze urugamba rwo kuyihagarika.
Aba bayobozi kandi biteganyijwe ko bazasura Ibiro Bikuru by’Ingabo z’u Rwanda (Rwanda Defence Force Headquarters) aho bazagirana ibiganiro byimbitse ku bufatanye bw’ibihugu byombi mu bya gisirikare.
U Rwanda na Mozambique bisanzwe bifitanye umubano ukomeje gutera imbere mu by’umutekano, by’umwihariko mu bikorwa by’ubufatanye byo kurwanya inyeshyamba mu Ntara ya Cabo Delgado, aho ingabo z’u Rwanda zifatanya n’iza Mozambique mu bikorwa byo kugarura amahoro.
