Ubutumwa bw’Umuryango w’Abibumbye bushinzwe kugarura amahoro muri Repubulika Iharanira Demokarasi ya Congo (MONUSCO) bwahaye ibikoresho urwego rushinzwe kugenzura iyubahirizwa ry’agahenge (EJVM+), mu rwego rwo kongera ubushobozi bwo gukurikirana no kugenzura ishyirwa mu bikorwa ry’amasezerano y’agahenge mu Burasirazuba bwa RDC.
Iki gikorwa cyabereye i Goma, kuwa Kane tariki ya 4 Kamena 2026, kiyoborwa n’umuyobozi wa MONUSCO mu Mujyi wa Goma, Gani Are, wari uhagarariye intumwa yihariye y’Umunyamabanga Mukuru w’Umuryango w’Abibumbye ndetse n’umuyobozi wa MONUSCO muri RDC.
Gani Are yavuze ko iki gikorwa gishingiye ku mwanzuro nimero 2808 (2025) w’Akanama k’Umuryango w’Abibumbye gashinzwe amahoro, uha MONUSCO inshingano zo gufasha ishyirwa mu bikorwa ry’amasezerano y’agahenge yasinyiwe mu biganiro bya Doha.
Yasobanuye ko ibiro bishya byubatswe hamwe n’ibikoresho byatanzwe bizafasha urwego EJVM+ gukora neza kurushaho, cyane cyane mu gihe Uburasirazuba bwa RDC bugikomeje guhura n’ibibazo by’umutekano muke.
Mu bikoresho byashyikirijwe harimo ibiro bishya ndetse n’icyumba cy’inama gifite ibikoresho byose bikenewe.
Biteganyijwe ko bizongera ubushobozi bw’imikorere, ubwikorezi n’imicungire y’ibikorwa by’uru rwego ndetse n’izindi nzego zishinzwe gukurikirana iyubahirizwa ry’agahenge.
Ibi bizafasha amatsinda ashinzwe kugenzura ishyirwa mu bikorwa ry’amasezerano,gufatanya neza, gukurikirana ibibazo by’umutekano no gutanga ibisubizo byihuse igihe habayeho kurenga ku masezerano y’agahenge.
MONUSCO ikomeje kandi gutanga ubufasha bwa tekiniki ku nzego z’Akarere zikorera munsi y’urwego mpuzamahanga rw’ibihugu byo mu karere k’ibiyaga bigari (CIRGL), harimo n’urwego ruhuriweho rwagutse rushinzwe kugenzura iyubahirizwa ry’agahenge (MCVE+).
Izi nzego zifite inshingano zo gukora iperereza ku bikorwa bishobora kurenga ku masezerano y’agahenge, zibifashijwemo n’impande zose bireba, hagamijwe gukumira ko amakimbirane yakongera gufata indi ntera.
Binyuze muri ubu bufasha bushya, MONUSCO yizeye ko izatanga umusanzu ufatika mu kugarura amahoro n’umutekano mu Burasirazuba bwa RDC, aho ibikorwa by’imitwe yitwaje intwaro bikomeje guteza umutekano muke n’ibibazo by’ubutabazi.
Ibi bibaye mu gihe hakomeje ibikorwa bya dipolomasi n’izindi gahunda zigamije gushimangira iyubahirizwa ry’agahenge no kugarura umutekano mu Burasirazuba bwa RDC.
