Ikigo cy’Igihugu cy’Iteganyagihe, Meteo Rwanda, cyatangaje ko Mu gice cya gatatu cy’ukwezi kwa Nzeri 2026 (kuva tariki ya 21 kugeza ku ya 30), mu Rwanda hateganyijwe imvura iri hagati ya milimetero 9 na 75, ikaba iri ku kigero cy’impuzandengo y’isanzwe igwa muri iki gice. Mu gihe biteganyijwe ko hazaboneka umuyaga mwinshi uruta usanzwe uboneka muri icyo gihe.
Meteo Rwanda yatangaje ko iminsi izagwamo imvura izaba iri hagati y’iminsi itatu n’irindwi bitewe n’imiterere ya buri hantu. Ubushyuhe bwo hejuru buteganyijwe buri hagati ya dogere Selisiyusi 22 na 33, naho ubushyuhe bwo hasi buteganyijwe buri hagati ya dogere Selisiyusi 11 na 19. Ubushyuhe buteganyijwe buri hejuru gato y’impuzandengo y’ubusanzwe buboneka muri iki gice.
Imvura iri hagati ya milimetero 60 na 75, iteganyijwe mu burengerazuba bw’Uturere twa Rubavu, Rutsiro na Karongi, Akarere ka Nyamasheke uretse uburasirazuba bwako, n’igice cyo hagati cy’Akarere ka Rusizi.
Ubushyuhe bwo hejuru bwinshi buri hagati ya dogere Selisiyusi 32 na 33, buteganyijwe mu bice byinshi by’Umujyi wa Kigali, amajyaruguru n’uburasirazuba by’Akarere ka Bugesera, uburengerazuba bw’Akarere ka Ngoma, amajyaruguru y’Akarere ka Kirehe, uburasirazuba bw’Uturere twa Kayonza na Nyagatare, igice gito cy’Amayaga no mu kibaya cya Bugarama.
Umuyaga mwinshi ufite umuvuduko uri hagati ya metero 8 na 12 ku isegonda uteganyijwe mu bice byinshi by’Uturere twa Karongi, Rutsiro na Rubavu, uburasirazuba bw’Akarere ka Nyamasheke, uburengerazuba bw’Uturere twa Nyamagabe, Ngororero na Nyabihu.
Meteo Rwanda yatangaje ko bitewe n’umuyaga mwinshi uteganyijwe mu bice bitandukanye by’Igihugu, cyane cyane mu Turere twa Karongi, Rutsiro, Rubavu, Nyamasheke, Nyamagabe, Ngororero na Nyabihu; Abaturarwanda bakwiye gukomeza gufata ingamba zo kwirinda ingaruka zaturuka ku muyaga mwinshi uteganyijwe, bakurikiza amabwiriza bahabwa n’inzego zishinzwe gukumira Ibiza.
