Kuri uyu wa Kabiri, tariki 29 Nzeri 2026, ikipe y’Igihugu ya Cape Verde ‘Blue Sharks’ irakira ikipe iy’u Rwanda ‘Amavubi’ mu mukino w’umunsi wa kabiri w’amatsinda yo gushaka itike y’Igikombe cya Afurika cya 2027, kizabera muri Kenya, Tanzania na Uganda.
Uyu mukino uzatangira saa kumi n’ebyiri z’umugoroba ku isaha y’i Kigali (18h00), kuri Estádio Nacional de Cabo Verde.
Mu mukino wa mbere w’itsinda K, u Rwanda rwatsinze Liberia ibitego 3-1, naho Capo Verde yatsinzwe na Mali ibitego 3-1.
Mu mateka y’umupira w’amaguru Cape Verde imeze neza kurusha u Rwanda kuko yitabiriye Igikombe cy’Isi inshuro imwe, cy’uyu mwaka, ndetse yitabira Igikombe cya Afurika inshuro 4 muri 2013, 2015, 2021 na 2023.
Kuri iyi ngingo, u Rwanda ntabwo ruritabira na rimwe Igikombe cy’Isi ndetse rwitabiriye inshuro imwe gusa Igikombe cya Afurika muri 2004.
Aya makipe yombi aheruka guhura muri 2020 n’ubundi mu gushaka itike y’Igikombe cya Afurika, icyo gihe amakipe yanganyije 0-0 mu mikino yombi.
Umukino ubanza wabereye muri Cape Verde tariki 12 Ugushyingo 2020, naho uwo kwishyura ubera mu Rwanda tariki 17 Ugushyingo 2020 ndetse muri uwo mukino u Rwanda rwari rwabonye ikarita y’umutuku ku munota wa 29 yahawe Niyonzima Ally.
Mu mikino 10 Cape Verde iheruka gukina muri rusange yatsinzemo imikino 3, inganya 3, itsindwa 4, yinjije ibitego 15, yinjizwa 14.
Ku ruhande rw’Amavubi, mu mikino 10 iheruka gukina yatsinzemo 4, anganya umwe, atsindwa 5, yinjije ibitego 11, yinjizwa 11.
Cape Verde ni ikipe nziza iyo iri gukinira imbere y’abafana bayo kuko iheruka gutsindwa mu mikino yakiriye tariki 10 Ukwakira 2024, icyo gihe yatsinzwe na Botswana igitego 1-0 n’ubwo n’umwaka ushize yatsinzwe na Iran kuri penaliti 5-4, ariko iminota 90 yari yarangiye ari 0-0.
Ubundi mu mikino 10 Cape Verde iheruka kwakira, yatsinzemo 7, inganya 2, itsindwa 1.
Imibare igaragaza ko Amavubi atari meza iyo atakiniye mu Rwanda, mu mikino 10 aheruka gukinira hanze yatsinzemo 2, anganya 1, atsindwa 7.
N’ubwo Cape Verde yatsinzwe umukino wa mbere w’amatsinda ariko ni ikipe imaze igihe yitwara neza kurusha u Rwanda dore ko kuri ubu iri ku mwanya wa 64 ku rutonde rw’Impuzamashyirahamwe y’Umupira w’Amaguru ku Isi, FIFA, naho u Rwanda ruri ku wa 128.
Bamwe mu bakinnyi beza bo kwitega muri Cape Verde barimo umuzamu Josimar José Évora Dias ‘Vozinha’ wigaragaje mu Gikombe cy’Isi cy’uyu mwaka bikarangira ashyizwe no mu ikipe nziza y’irushanwa ndetse kuri ubu akaba ari mu bazamu 10 bahataniye igihembo cy’umuzamu mwiza ku Isi, Yashin Trophy.
Abandi bakinnyi bo kwitega ba Cape Verde y’umutoza Humberto Frederico Silva Bettencourt barimo Kevin Pina, Sidny Lopes Cabral, Gilson Tavares, Diney Borges, Deroy Duarte na rutahizamu Dailon Rocha Livramento.
Ikipe y’u Rwanda y’umutoza Stephen Constantine nayo ifite abakinnyi beza bitezweho kuyifasha byinshi barangajwe imbere na Leroy-Jacques Mickels, Biramahire Abeddy, Bizimana Djihad, Joy-Lance Mickels, kapiteni Bizimana Djihad, umuzamu Ntwari Fiacre, Niyomugabo Claude na Na Nshuti Innocent bose bagize umukino mwiza wa Liberia.
