Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi, NAEB, cyatangaje ko umusaruro ukomoka ku buhinzi n’ubworozi woherejwe ku masoko mpuzamahanga kuva ku wa 17 Mata kugera ku ya 1 Gicurasi 2026 winjirije u Rwanda miliyari 13,7 Frw mu minsi itanu.
Ibi byatangajwe muri raporo y’icyumweru itangazwa na NAEB, igaragaza uko ibikomoka ku buhinzi n’ubworozi byoherejwe ku masoko yo hanze n’amafaranga byinjije.
NAEB yatangaje ko umusaruro woherejwe ku isoko mpuzamahanga muri iyo minsi itanu ari toni 9488, zirimo; ikawa, icyayi, imboga, imbuto, indabo n’ibindi bitandukanye.
Hoherejwe toni 236 z’ikawa zinjije miliyari 1,2 Frw, hoherezwa toni 1232 z’icyayi zinjije miliyari 5 Frw. Ni mu gihe kandi hoherejwe imboga zipima toni 366 zinjije miliyoni 898 Frw.
Imbuto u Rwanda rwohereje ku isoko mpuzamahanga muri iyo minsi zipima toni 517, zinjije miliyoni 542 Frw, naho indabo zoherejwe ni toni 17 zagurishijwe miliyoni 137 Frw.
Ibihingwa bitandukanye (ibinyabijumba, ibinyamisogwe, ibinyampeke n’ibindi) u Rwanda rwohereje hanze ibipima toni 6541, birwinjiriza miliyari 5.2 Frw.
Ku bijyanye n’amatungo n’ibiyakomokaho hoherejwe ibipima toni 572, aho byinjirije u Rwanda asaga miliyoni 695 Frw.
NAEB yagaragaje ko muri rusange umusaruro w’ibikomoka ku buhinzi n’ubworozi woherejwe ku masoko mpuzamahanga wagurishijwe mu bihugu birimo u Bwongereza, u Buholandi, u Bufaransa, Leta Zunze Ubumwe z’Abarabu, u Budage, Nigeria n’ibihugu byo ku Mugabane wa Afurika.
