Ikipe ya Rayon Sports inyagiwe n’ikipe ya Yanga Africans yo muri Tanzania mu mukino wa gishuti wari wateguwe na Rayon Sports ku munsi mukuru wa Rayon Day.
Ni umukino wabereye muri Stade Amahoro kuri uyu wa gatanu, tariki ya 15 Kanama 2025, wari witabiriwe n’abayobozi ba Rayon Sports bari kumwe n’aba Young SC ndetse n’abafana b’amakipe yombi.
Buri mwaka, iyi kipe ifite abafana batari bake yambara umwambaro w’ubururu n’umweru itegura umunsi wihariye uhuza abakunzi bayo, ikanakina umukino mpuzamahanga wa gishuti.
Ku ikubitiro umukino ugitangira ikipe ya Rayon Sports yatsinze igitego cya mbere Yanga SC, ni igitego cyitsinzwe na myugariro wa Yanga SC, Aziz Andabwile .
Impande zombi zakomeje gukinana imbaraga ariko ku munota wa 27, Yanga SC yaje kwishyura iki gitego gitsinzwe na Rutahizamu Boyeli Max wateye umupira mu ncundura, umunyezamu Kouyate ntiyagira byinshi akora uruhukira mu nshundura.
Yanga SC Yakomeje gukora ubusatirizi ubona ko ishaka igitego ndetse ku munota wa 44 yaje kukibona gitsinzwe na Pacome Zouzoua, igice cya mbere kirangira Yanga SC itsinze Rayon Sports ibitego 2-1.
Mu gice cya kabiri hagarutsemo impinduka mu bakinnyi ku mpande zombi, gusa Rayon Sports ntiyagaragaweho imbaraga nyinshi mu busatirizi ndetse no kwataka. Mu minota y’inyongera isoza igice cya kabiri, Yanga SC yongeye gutsinda Rayon Sports Igitego cya gatatu cyatsinzwe na Mwamnyeto.
Umukino warangiye Yanga SC yo muri Tanzania itsinze Rayon Sports ibitego 3-1, mu mu gihe abamenyereye iby’umupira banze gutera ibuye iyi kipe bavuga ko Abakinnyi n’umutoza bose ari bashya bataramenyerana.
Nyuma y’umukino ikipe ya Yanga SC yahawe igikombe cy’umunsi wa ‘Rayon Day’, ndetse Abakinnyi bambikwa imidali yishimwe byakozwe n’abarimo Perezida wa Rayon Sports , Thadde.
