Rutahizamu ukinira ikipe y’Igihugu y’u Rwanda ‘Amavubi’ Joy-Slayd Mickels yatangajwe nk’umukinnyi mushya w’ikipe ya Hibernians FC ikina icyiciro cya mbere muri Shampiyona yo mu birwa bya Malta, YoHealth Malta Premier.
Joy-Slayd Mickels w’imyaka 32 yerekeje muri iyi kipe nyuma y’umwaka umwe yari amaze muri Azerbaijan akinira ikipe ya Karvan İK yo mu cyiciro cya mbere.
Joy-Slayd Mickels ni impanga ya Joy-Lance Mickels ukinira ikipe ya Sabah FK ndetse umaze iminsi ayifasha mu rugendo rwo gushaka itike ya UEFA Champions League ndetse bagira na murumuna wabo Leroy-Jacques Mickels uherutse kwerekeza mu ikipe ya SV Waldhof Mannheim ikina ikiciro cya 3 mu Budage.
Hibernians F.C ni ikipe yashinzwe mu 1922, ikaba ikinira kuri Sitade Tony Bezzina iherereye Paola muri Malta, iyi sitade ikaba ifite ubushobozi bwo kwakira abafana bakabakaba ibihumbi bitatu.
Uretse kuba iyi kipe yihariye agahigo ko kuba ariyo kipe itaramanuka na rimwe muri Malta, imaze gutwara ibikombe 13 bya Shampiyona, ibikombe 11 by’igihugu n’ibikombe 5 Biruta ibindi (Super Cup).
Mu mwaka ushize w’imikino wa 2025/26, Hibernians FC yasoreje ku mwanya wa 7 mu makipe 12 ku rutonde rusange rwa Shampiyona.
