Perezida Kagame ari kuganira n’urubyiruko mu gikorwa cyiswe Meet The President

Mu gusoza Meet The President, Butera Isheja Sandrine, wari uyoboye gahunda yasabye Umukuru w'Igihugu cyo yakwemera abari muri BK Arena bakamwifuriza isabukuri nziza y'amavuko yizihiza tariki 23 Ukwakira.

Abari muri BK Arena barimbiye Umukuru w'Igihugu bamwifuriza umunsi mwiza w'amavuko.

Chef Arsene yabajije ikibazo cya Monetization y'imbuga nkoranyambaga aho kigeze gikemurwa.

Minisitiri Paula Ingabire yasobanuye impamvu monetazation idakunda mu Rwanda, aho yavuze ko imbogamizi zari zihari mu minsi ishize, harimo n’ibisabwa kugira ngo kwamamaza ku mbuga nkoranyambaga bishoboke.

Yavuze ko ikindi cya kabiri ari uburyo umuntu yishyurwa. Yavuze ko umuntu yishyurwa binyuze muri PayPal na Stripe. Yasobanuye ko hari ibiganiro biri gukorwa hagati ya PayPal na Equity Bank Rwanda ku buryo kwishyurwa bishobora gukorwa.

Yasobanuye ko ibigo byose byaganirijwe ku buryo nihongera kwemererwa ibindi bihugu kugira ngo monetazation ikunde, u Rwanda narwo rwazagerwaho.

Chef Arsene yabajije ikibazo kijyanye no gutangira no kwihangira imirimo aho yagaragaje ko umuntu ufite amikoro make agorwa no gutangira imirimo kuko asabwa ibintu birenze ubushobozi bwe.

Yavuze ko nk’umuntu ugitangiza ibihumbi 500 Frw asabwa gukorwa ibintu nk'ibyo umuntu ifite umushinga wa miliyobni 20 Frw.

Ikindi yabajije ni ikijyanye na monetization y’imbuga nkoranyambaga kuko n’ubu abari mu Rwanda batabasha kuzibyaza amafaranga.

Perezida Kagame yavuze ko gukorana ibintu byujuje ubuziranenge ari intego, asobanura ko ahavuka ikibazo ari ukubahiriza ubuziranenge n’icyo bisaba asaba abantu gutandukanya kuzuza ubuziranenge n'ibisabwa.

Yavuze ku bijyanye no kuba umuntu ufatira amashusho mu muhanda ashobora kubuzwa kuhakorera, Umukuru w’Igihugu yamubajije niba ibyo yakoreraga mu muhanda niba ari bizima kandi ko n’ababuza abantu gukorera ibintu runaka mu muhanda, bakwiriye gusobanura niba ari bizima.

Perezida Kagame yatanze urugero ku mategeko yo gukoresha drones mu Rwanda, avuga ko hari abaturuka hanze bakazana izabo, bakaza kubonwa ahantu bakoresha drones mu buryo butemewe nta byemezo.

Ati “Abantu iyo bava hanze ku mipaka itandukanye, abantu bakabona drones kubera ko hari abazikoresha nabi batabanje gusaba ibyangombwa, bakazibika ku mipaka kugeza igihe bazasohokera bakazisubizayo. Ziguma ari izabo ariko uko bazikoresha ntabwo ari bo babigena, bigenwa n’amategeko yo mu gihugu. Umuntu rero ashobora gukora nk’ibyo agakoresha drones uko ashaka, bamubuza bikaba ikibazo.”

Umunyamabanga wa Leta muri Minisiteri ya Siporo, Rwego Ngarambe, yavuze ko imiyoborere y’u Rwanda yubatse neza ku buryo umuntu wese yayigiramo uruhare. Yasabye urubyiruko kuzitabira amatora y’inzego z’ibanze, ategerejwe rugatanga umusanzu mu kubaka igihugu no kugira uruhare mu ifatwa ry'ibyemezo.

Yagize ati “Genda ugire ijambo, ujye inama dushake ibisubizo. Ndashaka ko mukora siporo, mu mutwe, mu mubiri, ni bwo buryo tuzabashaka kubaka iki gihugu dukomeye mu bwonko…murebe inzego z’umutekano abantu bazirimo uko bangana, nubwo baba bafite 60, ntiwamenya ko bangana uko bangana.”

Umukuru w'igihugu ari kwakira ibibazo bitandukanye by'urubyiruko ndetse akabisubiza ibyo adasubije akabishyikiriza abayobozi bireba ngo babikemure.

Mu bibazo byabajijwe, harimo ibijyanye n'uburezi.

Hari uwasabye ko mu mashuri makuru na za kaminuza hashyirwamo isomo ryigisha imideli, n'undi wabajije uburyo abanyeshuri bahabwa ibigo, aho usanga hari abahabwa amasomo batsinzwe mu bizamini bya leta.

Iki kibazo yasabye Umunyamabanga muri Minisiteri y'Uburezi, Irere Claudette, kugikurikirana umuntu akajya ahabwa kwiga ibintu bijyanye n’ibyo ashoboye.

Hari n’undi wasabye ko n’inyigisho zo mu madini ku bijyanye n’inzoga zahinduka mu gihe leta iri gusaba abantu kuzirinda.

Undi munyeshuri yavuze ko hari ikibazo cya internet iri guhenda muri iki gihe, ndetse na serivisi zitangwa nabi mu bigo by’abikorera n’ibya leta. Yatanze urugero kuri serivisi zo kwa muganga zitinda cyane.

Perezida Kagame yavuze ko ikibazo cya serivisi kimaze kuvugwa kenshi kuko hari n’abagiye babura ubuzima bwabo kubera serivisi mbi. Yatanze urugero rw’umubyeyi w’i Karongi wapfuye n’umwana we kubera kurangaranwa.

Ati “ Ikibazo ni impamvu ki ibintu nk’ibyo bitahinduka. Biri mu nzego zitandukanye z’ubuyobozi, mu turere, aho ariho hose, usanga ibintu nk’ibyo bigikorwa.”

Habajijwe kandi ikibazo kijyanye na Interinet yahenze.

Minisitiri w’Ikorabuhanga na Inovasiyo, Paula Ingabire, yavuze ko ibiciro bya internet byazamutse kubera uburyo bwo guhindura ikava kuri 2G na 3G hakoreshwa internet yihuta ya 4G na 5G. Yasobanuye ko uko kuzamura umuvuduko byatumye n’ibiciro bizamuka

Perezida Kagame yagarutse ku kibazo kijyanye n'imyambarire cyagarutsweho ku mbuga nkoranyambaga aho yavuze ku mukobwa wafashwe na polisi bitewe n'imyambarire ye avuga ko yarenganyijwe.

Umukuru w'Igihugu yavuze ko yahamagaye Umuyobozi Mukuru wa Polisi, CG Felix Namuhoranye, amusobanurira ko abapolisi batumvise amabwiriza neza, abaza uko uwo mukobwa yari ameze, bamwoherereza ifoto ye, asanga uyu mukobwa yararenganye.

Yavuze ko yabajije CG Namuhoranye ati “None se uyu yazize iki ko ndeba ibidakwiriye kwanikwa ku gasozi byitaweho? Ikibazo cyanyu ni ikihe?”

Perezida Kagame yavuze ko byagaragaye ko umupolisi wafashe uriya mukobwa ashobora kuba yari ananiwe, asaba abantu bajya bababarirwa kuko hari ubwo babiterwa n'akazi gakomeye baba bakoze umunsi wose bigatuma bakora bagakora amakosa.

Umukuru w’Igihugu yagaragaje ko abantu bakwiye kwambara bijyanye n’ibihe barimo cyangwa aho bagiye, kuko umuntu wambaye nk’ugiye ku mucanga iyo agiye mu nama, abantu bikanga.

Perezida Kagame yavuze ko ikibazo cy’imyambarire atari icy’abagore gusa, kuko n’umugabo agiye mu nama ameze nk’uvuye muri gym, yibazwaho n’abamubonye.

Perezida Kagame yagarutse ku kibazo cy'abantu bakora ubukwe bagapanga gukora ibintu bihenze ndetse rimwe na rimwe bagasesagura kandi hari ibyo bakara byiza kandi bigatwara amafaranga make.

Umukuru w'Igihugu yavuze ku mwana yareze akiri muto akajya amugira inama ariko ntazumve.

Yavuze ko uyu mwana yaje gukora akageza igihe cyo gushaka umugore ndetse amubaza icyo yamufasha muri ubwo bukwe atungurwa n'ibyo yamuhaye yari yanditse ku gapapuro amubwira ko ari byo ashaka gukora muri ubwo bukwe ndetse byari bifite agaciro ka miliyoni 10 Frw.

"Yazanye agapapuro mbona ibintu bigeze hafi miliyoni 10 Frw. Ndabireba ndamubaza nti ubu nyaguhaye ibibazo byawe bijyanye n’ibi byaba bikemutse? Ati rwose".

Perezida Kagame yavuze ko uyu mwana yagize ikibazo cy'uko akunda gukurikirana cyane, kandi abaza utuntu twinshi.

Yagize ati "Nari namenye ko yagiye mu bantu benshi asaba imfashanyo zo kurongora. Kandi uwo mwanya akora muri Perezidansi, ubwo ni umuntu ukomeye.”

“Ndamubwira nti ko bambwiye ko mujya mu bantu mushakisha uko mukora ubukwe, ndamubwira nti ikibazo ndakigukemurira. Ubwo muri ayo harimo gukodesha ahantu h’igitangaza kugira ngo ubukwe buzahabere. Ibyo nta kibazo iyo ubishoboye. Ndamubwira nti ka nkukemurire ikibazo vuba na bwangu tutagiye muri byinshi, hari ibintu bimwe ngiye gukosora, njya kuri ya lisiti ngenda mvanamo ibintu bimwe.”

Umukuru w'Igihugu yavuze ko icya mbere yakuyemo ari ukuzajya muri hoteli ihenze kubera gukora ubukwe.

Ati “Keretse ari iyawe ufite amafaranga warayubatse. Ari iyawe rwose naba ngushimira nti ariko icyo ngiye gukora, hariya ku kazi aho nkorera muri Village Urugwiro, mfite ubusitani bwiza, icyo ndi bugukorere rero, nzakubakiramo ihema ryiza n’ibindi byiza. Ibyo uzakenera byose uzabihasanga, ndetse abashinzwe umutekano ndababwira bazemerere abantu bose ushaka kuzanamo binjire muri Perezidansi.”

Yavuze ko icya kabiri yamubwiye ari ikijyanye n’imyambaro, aho yamubwiye ko azajyana nawe mu rugendo, hanze nk’umukozi.

“Hanyuma hanze hariya nzakwishyurira ujye mu iduka ugure imyenda tugaruke. Ikindi kuri ibi bijyanye n’inzoga, hariho amafaranga menshi yo kwakira abantu. Ndamubwira nti mbese abantu ukeka bazaza mu bukwe bwawe bangana bate, ati ni nka 600, ndamubwira nti wari uziko muri 600 bazaza, ugasengera nk’uko, bamwe bazaba babaza ngo twaje mu bukwe bwa nde harya? Kuko abenshi bazaba bazanywe no kunywa cyangwa bazazinywa bibagirwe n’uwo baziye mu bukwe.”

“Ndamubwira nti rero, mu bintu ntazemera, ibindi byose nzabyemera, mu busitani ntabwo nzemera ko hazamamo inzoga. Tuzakora imitobe myiza myinshi, dukore ikawa n’icyayi na soda n'unwo numva atari ngombwa. Ibindi rero, aya mafaranga miliyoni 10 Frw, nzayaguha nyuma y’ubukwe, ntabwo nzayaguha mbere y’ubukwe. Nti kuko ndashaka ngo izi miliyoni 10 Frw warangije ubukwe, uzashake icyo uyakoresha cyubaka urwo rugo aho kugira ngo miliyoni 10 Frw abantu bazinywere uriya munsi zishire.

Muri iki kiganiro Umukuru w'Igihugu yavuze ko hari bamwe mu bantu bakoranye bari barabaswe n'inzoga akagerageza kumuhendahenda ariko biranga aramunanira.

Yavuze ko byageraga mu masaha ya nimugoroba ntamubone akumva ko bishobora kuba ari inshingano zo murugo ahubwo ari inzoga zamubase.

Perezida Kagame yavuze ko umunsi umwe yigeze gutuma abashinzwe umutekano yabuze, abasaba kumushakisha, baragenda baramuzana yinjira mu nzu, azamuka ingazi atabasha kugenda neza.

Ati “Njye nari ndi hejuru, ndahagarara, ndeba hasi mutegereje ngo yinjire. Ntiyari azi ko mureba. Arinjira, ageze aho, kuzamuka amasikariye biranga, afata ku cyumba agenderaho, ntazi ko mureba. Arazamuka ageze hejuru agize atya asanga mpagaze aho ndamureba. Ndamubaza nti ese kanaka wabaye iki? Arambaza ati njyewe? Ampindura umusazi rwose.”

Yavuze ko yamubajije impamvu ari kugendera ku rukuta biramugora gusobanura. Ngo yamubwiye ko yashakaga kugira ngo yimenyere ibye, mu gitondo amubaza niba yabasha gukora akazi ibindi akabyirinda.

Yavuze ko nyuma bukeye ibicyezicyezi byamushizemo yamubajije icyakorwa ariko bikarangira amunaniye ntibakomeza gukorana.

Perezida Kagame yavuze ko urubyiruko rudakwiye kumva ko igisubizo cy'ibibazo bafite ari inzoga cyangwa ubusinzi avuga ababikora bibeshya kuko tacyo bibafasha ahubwo ko ari nk'ikinya kuko iyo bigushizemo ujya habi kurushaho.

“Izo nzoga nta nubwo ziryoshye. Baravuga ngo bakurikiramo uburyohe, nta burimo, ariko nyine biguma bijya mu mutwe, rimwe hari ababikora bibwira ngo bibafasha bibwira ngo bibafasha kunyura mu buzima bukomeye kuko urasinzira, ntabwo ari ugusinzira, uraraba. Ni nk’ikinya. Ni uguhora witera ikinya ngo ubone ko umunsi wahita. Ntabwo aribyo.

Ibyiza ni uko wahangana n’ibitaryoshye n’ibitakuryoheye by’ako kanya ariko uzi ngo ubifitemo ubuzima bwiza buzakugeza ku biryoshye. Imyifatire rero y’abantu rero ni ingenzi.”

Perezida Kagame yatangiye ashimira urubyiruko rwitabiriye ibi biganiro.

Umukuru w'Igihugu yavuze ko yishimira ko afite urubyiruko rumwumva kandi nawe atazaruvaho bityo ko ari akarusho kuri we kuko rwanze kumuvaho kandi ko abibona nk'amahirwe.

Yabwiye urubyiruko ko ubuzima bwigisha ndetse arugaragariza ko hari amasomo yigiye mu kiganiro cya 'Wari Uziko' cyanyuraga kuri Radio Rwanda kandi hari igihe byigeze kumufasha ubwo yari ahuiye n'ikibazo agakomereka bikaba ngombwa ko yivura.

Yagize ati " Hari ikiganiro cyanyuraga kuri Radio Rwanda cyitwaga wari uziko ushobora gufata ibibabi by'igiti ukabivuguta ugashyira ku gikomere kigakira?

Yavuze ko hari igihe yakeneye ibyo yumvise muri Wari Uziko nyuma y'imyaka 20 aho yafashe icyatsi cyitwa inyarabasanya akakivuguta ashyira ku gisebe akoresheje ikirere kandi byaramufashije.

Ubutumwa bwa Perezida Kagame bwabwiraga urubyiruko kudata umwanya ahubwo ko bakwiye kwiga bagakora kandi bagahiotamo ibibafitiye akamaro akaba ari byo bashyira imbaraga nyinshi birinda guta umwanya mu bitabafitiye akamaro.

Yagize ati " Ikintu cyose aho uri ntugate umwanya, wige, ukore ndetse ushakishe kwishyiramo kumenya ikizima ni ikihe icyitari kizima ni ikihe? Hanyuma ikizima ukagikorera ikitari kizima ukakirinda ugakomeza ukiyubaka uko igihe gihita".

Yabwiye urubyiruko ko ibyo byose bisaba ikinyabupfura no kugendera ku muringo ukwiye kandi ntibibe iby'akanya gato ahubwo bikaba ibihoraho ku buryo umuntu ahozaho.

Umukuru w'Igihugu yabwiye urubyiruko ko imyaka barimo ari ho umuntu agira umurongo w'ubuzima akazaba umuntu muzima cyangwa bikarangira byanze kuko umuntu yangirika akiri mu myaka rurimo ariko ko ntamuntu uba ukwiye gucika intege kuko hari ibiba bigishoboka.

Yagize ati " Ariko bijya birangira niba iyo myaka warasanze hari ibyo watakaje iyo uzanzamutse ukavuga uti imyaka [...] hari abatwarwa n'amarangamutima n'ibyoroshye ku Isi bakazimira. Ariko aho uzakangukira ujya umenya ko haracyari igihe cyo kugira ngo ubihindure ugire ubuzima bwiza. Ntukihebe ntukavuge ngo [...] amazi yarenze inkombe, ashobora gusubizwayo aho yaturutse".

Yibukije urubyiruko ko byose bijyana n'imyatwarire y'umuntu kandi akamenya ko atari kurui we gusa ahubwo no ku bandi kuko ntamuntu wikorera adafite undi abereyeho.

Iyo myitwarire uba ugomba kuyigiramo atari kuri wowe gusa ahubwo no ku bandi kuko nta wowe gusa ubaho hatariho undi. Ntibibaho ni wowe gusa mu muryango ni wowe gusa muri sosiyete ni wowe gusa mu gihugu. Kwiyubaka bijyana n'ibitekerezo bizima n'imikorere mizima."

Yavuze mko umuntu adakwiye kubanza kurebera ku by'abandi bakoze ahiubnwo ko akwiye kubanza kwirebaho agahitamo ikizima kuri we. Yavuze ko n'ubwo atari bibi kwigira ku bandi ariko umuntu ku giti cye ari we ukwiye kumenya ikimukwiye kandi kizima hanyuma byahura n'iby'abandi bikaba ari byiza.

Perezida Kagame yavuze ko nta muntu n'umwe wigisha undi kugira imyitwarire ihwitse ahubwo ko umuntu ubwe ari we ubanza kwiyubaka cyangwa akiyangiza kuko bntawe utamika cxyangwa ngo ahatire undi kugira imyatwarire iboneye.

Yagize ati " Kwiga cyangwa kugira imyitwarire myiza nta muntu ushobora kubigutamika ariko ushobora kwigira ku bantu uko wakwitwara neza. N'ibi byo kunywa inzoga cyangwa ibiyobyabwenge, urumogi, dushobora gutanga amasomo tukakwereka ibibi byabyo, ingaruka zabyo abo byagiriye nabi [...] iyo bihuje nawe ibyo utekereza ni byo bishobora gufasha kuguhindura kuba muzima."

Minisitiri w'Ikoranabuhanga na Inovasiyo, Ingabire Paula, yavuze ko hari amahirwe menshi ari mu Rwanda urubyiruko rushobora kubyaza umusaruro haba ashingiye ku ikoranabuhanga cyangwa ahandi.

Yavuze ko mu Rwanda mu rwego rw'ubuhinzi rukorama abasaga miliyoni ebyiri mu gihe mu rwego rw'ubucuruzi harimo abasaga ibihumbi 700 naho mu zindi serivize zitandukanye harimo abasaga ibihumbi 500.

Yagaragarije urubyiruko gahunda z'igihe kirekire igihugu gifite avuga ko nk'urubyiruko rufite amahirwe kuko ruri mu gihe aho ikoranabuhanga rikoreshwa mu nzego nyinshi ndetse umuntu yaryifashisha mu gushaka amasoko y'ibicuruzwa bye.

Yavuze ko icyerecyezo cy'u Rwanda gikubiye mu bintu bitatu birimo kureba uko hakongerwa umusaruro mu byo dukora, kwagura amasoko akarenga ayo mu Rwanda gusa no kubyaza umusaruro amahirwe ahari abantu bakabona akazi bakiteza imbere.

Yagaragarije urubyirukomko ikorabuhanga rikomeje guhindura isi bityo ko narwo rukwiye kuryifashisha mu guhanga ibishya bizatuma baribyaza umusaruro ufatika binyuze mu kwiga gukora ibintu binyuranye bizatuma babasha kugendera ku muvuduko Isi iri kugendaho.

Minisitiri w'Ubuzima Dr. Sabin Nsanzimana yasabye urubyiruko kugira intego mu buzima bwabo ariko birinda ibiyobyabwenge kuko ari kimwe mu bikoma mu nkokora intego umuntu yiha mu buzima bwe arusaba kubyirinda bakagira uruhare mu kubaka igihugu kuko ari bo bafite imbaraga zo gukorera igihugu.

Yarusabye kwirinda kwishora mu businzi bagafasha Umukuru w'Igihugu kubaka u Rwanda nuri Munyarwanda yifuza.

Agaruka ku kibazo cy'ubusinzi n'ibiyobyabwenge yabwiye urubyiruko ko ibiyobyabwenge ari umwanzi w'ubuzima aho yifashishije ubushakashatsi bwakozwe bugaragaza ko abantu banywa n'abatanywa ibiyobyabwenge aho bwagaragaje ko ababinywa 50% ari bo bageze ku nzozi zabo, mu gihe abandi 50% byarangiye ubuzima bwabo bwangiritse.

Yabasabye kwirinda ibirimo itabi avuga ko naryo rigira ingaruka ku hazaza h'urubyiruko kuko ririmo ubwoko bw'inshi bw'ibinyabutabire bigira ingaruka ku buzima bw'umuntu.

Dr. Nsanzimana yavuze ko hari abagira ibibazo bagahitamo kubikemuza kwishora mu kunywa ibiyobyabwenge avuga ko ari ukongera ibibazo mu bindi kuko birangira ubaye imbata yabwo.

Muri Meet The President urubyiruko rutanga ibitekerezo binyuranye ndetse n'ubuhamya aho uwitwa Shimirwa Palaimo yasangije bagenzi be inzira yanyuzemo kuva ku kubatwa n'ibiyobyabwenge kugera ku guhatana muri gahunda ya Youth Connekt.

Shimirwa wo mu Karere ka Gicumbi yavuze ko mbere yari umwana urerwa n'ababyeyi nk'abandi nk'abandi ariko ubuzima bwe bukaza guhinduka nyuma y'uko agiye mu ngeso mbi zirimo kunywa ibiyobyabwenge no gucuruza kanyanga ibizwi nko kuba umurembetsi.

Shimirwa yavuze ko yari umwana ufite uburere ariko nyuma y'uko atangiye gukorana n'abarembetsi ubuzima bwe bwahindutse kugera aho nawe yatangiye kunanira ababyeyi ahitamo kujya kwibana ndetse atangira gushora amafaranga mu kwinjiza kanyanga mu gihugu.

Yavuze ko nyuma yaje gufatwa ajyanwa mu kigo ngororamuco nyuma aza kuvamo yarahindutse ndetse atangira gusubira kumorongo aho yaje kujya kwiga imyuga ahitamo kwiga ububaji mu gihe cy'umwaka aho yaje gukuramo igishoro cya 230Frw.

Yaje Guhatana muri Youth Connekt ku nshuro ya mbere ntiyafatwa ariko nyuma aza kongera kugerageza ndetse arafatwa arahatana kuva ku rwego rw'Akarere kugera ku rwego rw'igihugu.

Yavuze ko kuri ubu ari umusore ubyuka ajya mu mirimo aharanira kwiteza imbere aho kuri afite imishimga itandukanye ndetse yasabye urubyiruko gukura amaboko mu mufuka rugakora kandi rukirinda ingeso mbi zirimo kwishora mu biyobyabwenge.

Minisitiri w'Urubyiruko n'Iterambere ry'Ubuhanzi, Dr. Utumatwishima Jean Nepo Abdallah, yashimiye Perezida Kagame ku mwanya agenera urubyiruko n'inama abaha umunsi ku munsi.

Minisitiri Utumatwishima yagaragaje bimwe mu bibazo byugarije urubyiruko harimo ibiyobyabwenge n'inzoga zitujuje ubuziranenge ndetse n'ibindi bikorwa bikoma mu nkokora iterambere ryabo.

Yabwiye Perezida Kagame ko urubyiruko rwafashe iya mbere mu kurwanya ibiyobyabwenge n'inzoga zitujuje ubuziranenge binyuze muri Gahunda ya 'SOBBER GEN' aho ruhurira mu bikorwa bitandukanye bigamije kurandura burundu inzoga z'ibyuma n'izindi ngeso mbi.

Yagaragarije Umukuru w'Igihugu ko gahunda ya Sober Gen imaze gutanga umusaruro aho kuru ubu urubyiruko ruri hejuru ya 95% rufite ubuzima buzira ibiyobyabwenge "Sober" kandi ko urugendo rugikomeje.

Minisitiri Utumatwishima yagarutse ku kibazo cy'imyambarire y'abakobwa n'abagore yagarutsweho n'abatari bake agaragaza ko bafashe umwanya wo gutega amatwi abakobwa bakumva ibyo babitekerezaho aho hafashwe umwanzuro w'uko Umubiri w'umukobwa cyangwa umugore akwiye kubahwa ndetse abagabo ari bo bakwiye gufata iya mbere mu kubahiriza iyi gahunda.

Nyakubahwa Perezida wa Repubulika, Paul Kagame, ageze muri BK Arena aho agiye kuganiriza urubyiruko rusaga ibihumbi 10 rwaturutse mu turere dutandukanye tw'igihugu.

Abayobozi mu nzego zitandukanye za leta barimo; Umugaba Mukuru w'Ingabo z'u Rwanda, Gen Murakakh Muganga, Umujyanama wa Perezida wihariye mu by'Umutekano, Gen (Rtd) James Kabarebe, Abaminisitiri, abanyamabanga n'abayobozi b'ibigo bitandukanye bamaze kugera muri BK Arena.

Mu bahageze harimo; Minisitiri wa MOYA Dr. Utumatwishima Jean Nepomuscene Abdallah, Minisitiri wa MINICT, Ingabire Paula, Minisitiri wa MIGEPROF, Uwimana Console, Minisitiri wa siporo, Nelly Mukazayire, Minisitiri wa MINALOC, Habimana Dominique, Minisitiri w'Ubuzima, Dr. Sabin Nsanzimama, Minisitiri wa MINAGRI, Dr. Thelesphore Ndabamenye n'abandi.

Aba bayobozi bitabiriye igikorwa aho Perezida wa Repubulika Paul Kagame, agiye kuganira n'urubyiruko rusaga ibihumbi 10 ruturutse mu bice bitandukanye by'Igihugu mu gikorwa cyiswe Meet The President

Ibyamamare mu ngeri zinyuranye harimo abahanzi nka Bruce Melodie, Mariya Yohana, Junior Rumaga, Ish Kevin, Logan Joe, n’abandi bazwi mu ruganda rw’imyidagaduro nka Nkusi Arthur, Uncle Austin, n'abandi bamaze kugera muri BK Arena ahagiye kubera gahunda Umukuru w’Igihugu ahuriramo n’urubyiruko izwi nka Meet the President

Urubyiruko rusaga ibihumbi 10 ruturutse mu bice bitandukanye by'igihugu rwamaze kugera muri BK Arena aho rugiye kuganira n'Umukuru w'Igihugu ku ngingo zitandukanye.